Эронда янги атом электр станцияси қурилиши бошланди

Эрон жануби-ғарбидаги Хузистон вилоятида қуввати 300 мегаватт бўлган янги атом электр станцияси қурилиши бошланди.

Фото: Reuters

Қорун АЭС қурилишига рамзий тамал тошини қўйиш маросимида Эрон вице-президенти ва Атом энергияси ташкилоти раҳбари Муҳаммад Исломий иштирок этди.

Қайд этилишича, электр станцияси PWR туридаги реактор (сув босими билан совитиладиган) ҳисобига ишлайди.

АЭС қурилиши тахминан 8 йил давом этади, лойиҳа қиймати 2 миллиард долларга баҳоланмоқда. Электр станцияси 4 фоизгача бойитилган уран асосида ишлайди.

Эронда 2013 йилда қуввати 1000 МВт бўлган Бушиҳр АЭС ишга туширилган эди. Ҳозирда унинг иккинчи блоки қурилиши давом этмоқда.