АҚШ 5 нафар россияликни электроника контрабандасида айблади

Нью-Йоркнинг Шарқий округи федерал суди беш нафар Россия фуқароси ва икки АҚШ фуқаросини Россия мудофаа саноати учун санкцияларни четлаб ўтган ҳолда, электрон компонентлар ва ўқ-дорилар контрабандасини ташкил қилишда айблади. Бу ҳақдаги хабар 13 декабрь, сешанба куни АҚШ Адлия вазирлиги сайтида эълон қилинди. Жами 7 кишидан иборат гуруҳга нисбатан фирибгарлик, жиноий тил бириктириш, контрабанда, жиноий даромадларни легаллаштириш ва санкцияларни бузиш каби 16 модда бўйича айблов қўйилган.

Маҳкама маълумотларига кўра, айбланувчилардан бири россиялик Вадим Коношченок октябрь ойида Эстония-Россия чегарасида 35 хил турдаги электрон компонентлар ва 6,5   миллиметрли снайпер милтиқларининг «минглаб» патронлари билан тўхтатилган. Орадан бир ой ўтиб, Америка томони ФХХ ходими деб ҳисоблаган Коношченок Эстония орқали Россияга 20 қути Америкада ишлаб чиқарилган патронларни олиб киришга уринаётганда яна тўхтатилди. Эркак ҳибсга олинганидан кейин Эстония расмийлари унинг ўғлига тегишли омборни тинтув қилиб, 170 кг ўқ-дориларни мусодара қилган.

АҚШ Адлия вазирлиги маълумотларига кўра, айбланувчилар Москванинг "Серния Инжиниринг" ва "Сертал" компаниялари манфаатларини кўзлаб фаолият юритган. Бу фирмалар, Вашингтонга кўра, «Россия разведка идоралари раҳбарлигида Россия ҳарбий-саноат комплекси ва илмий тадқиқот сектори учун илғор электроника ва мураккаб синов ускуналарини сотиб олади».

Айбланувчи АҚШ фуқароларидан бири аллақачон ҳибсга олинган, иккинчиси эса расмийларга таслим бўлган. Бундан ташқари, Коношченокни АҚШга экстрадиция қилиш бўйича Эстонияга сўров юборилган.

Америка Қўшма Штатларининг Нью-Йорк Шарқий округи бўйича прокурори унинг идораси «Россиянинг демократияга шафқатсиз ҳужумини давом эттириш учун АҚШ технологиясини ноқонуний сотиб олаётганларни қаттиқ таъқиб қилишдан тўхтатмайди» деди.