Самарқандда содир бўлган ЙТҲда икки нафар пиёда ҳалок бўлди

Самарқанд туманида содир бўлган йўл-транспорт ҳодисасида икки нафар пиёда вафот этган. Бу ҳақда вилоят ИИБ ЙҲХБ ахборот хизмати хабар бермоқда.

Ҳодиса 2023 йил 1 январ куни соат 21:30 ларда Самарқанд тумани Уста Умар Жўрақулов кўчасида содир бўлган.

AUDI ҳайдовчиси машина олдига югуриб чиққан икки нафар пиёдани уриб юборган. Оқибатда, оғир тан жароҳати олган пиёдалар вафот этган.

Ҳолат юзасидан Самарқанд тумани ИИБ ҳузуридаги тергов бўлими томонидан Жиноят кодексининг 266-моддаси 2-қисми билан жиноят иши қўзғатилган.

Қайд этилишича, гумонланувчи процессуал тартибда ушланган. Ҳозирда дастлабки тергов ҳаракатлари олиб борилмоқда.