Ҳаво ҳарорати қандай ўлчанади? Гидрометеорология марказидан репортаж

Об-ҳавони олдиндан билиш инсонлар учун ҳар доим қизиқ бўлган. Негаки, ишга ёки ўқишга отланаётганда кун давомида ҳаво ҳарорати қандай бўлишига қараб тайёргарлик кўрилади. Kun.uz мухбири Андижон вилояти Гидрометеорология марказида бўлиб, об-ҳавони аниқлаш механизми билан танишди.  

Андижон вилоятида 4 та метеостанция бор. Улардан ҳар 3 соатда об-ҳаво маълумоти олинади ва марказга юборилади.

“1956 йилдан бери фаолият юритиб келаётган бошқармамиз таркибида 4 та метеостанция мавжуд. Об-ҳаво маълумотини аваллари механик қурилмалар ёрдамида олган бўлсак, 2020 йилдан бошлаб автоматик қурилмаларни ишлата бошладик. Ҳар бир метеостанциядан 3 соатда бир маълумот олинади ва умумлаштирилиб, марказга узатилади. Шу тариқа об-ҳаво маълумоти шакллантирилади”, – дейди Андижон вилояти Гидрометеорология бошқармаси мутахассиси Гулрух Юлдашева.

Об-ҳаво маълумотининг аниқлик даражаси 3 кунни ташкил қилади. Автомобиллардаги ҳаво ҳароратини ўлчаш қурилмаси ва марказ тақдим этаётган маълумотлар ўртасидаги фарқнинг асосий сабаби марказ ускуналари 2 метр баландликдаги ҳавони ўлчайди. 

Кўпчилик фақат об-ҳавони аниқлаш билан шуғулланади дея ўйлайдиган Гидрометеорология марказида 200 дан ортиқ хизмат тури мавжуд экан.

Абдували Қурбонов, журналист
Тасвирчи – Жаҳонгир Турғунов