Британия Украинага Challenger 2 оғир танкларини беради

Буюк Британия Украинага 12 та Challenger 2 танкини етказиб беради, деди Британия бош вазири Риши Сунак Украина президенти Владимир Зеленскийга. 

«Бош вазир Буюк Британиянинг Украинага Challenger 2 танклари ва қўшимча артиллерия тизимларини етказиб бериш нияти борлигини таъкидлади. У ва бутун Буюк Британия ҳукумати халқаро ҳамкорлар билан биргаликда Украина ғалабасини таъминлаш учун тезкор ёрдам кўрсатмоқчи», - деб бош вазир сўзларини келтирди BBC. 

Ҳарбий экспертларнинг таъкидлашича, Challenger 2 танклари Украина фронтида унчалик фойда бермайдиган бир қатор хусусиятларга эга. Масалан, уларнинг оғирлиги 75 тоннага тенг, бу эса уларни кўприклардан ўтишини чеклайди, шунингдек, уларни сақлаш, техник кўрикдан ўтказиш ва ўқ-дорилар билан таъминлаш ҳам қийин бўлади. 

Conflict Intelligence Team таҳлилчиларининг ёзишича, бундай танкларнинг етказилиши фақат оғир қуролларни етказиб беришга қўйилган тақиқни олиб ташлаш учун фойдалидир. 

«Challenger 2 танкларини етказиб бериш эҳтиёт қисмлар ва логистика билан боғлиқ муаммоларга олиб келади. Challenger 2 танки жуда оғир: 75 тонна. (Таққослаш учун, Т-72Б3М танки оғирлиги тахминан 47 тонна). Совет даврида қурилган кўприклар 50 тоннагача юк кўтаришга мўлжалланган; Украинада мавжуд тиркамалар ҳам бундай оғир техникани ташишга қодир эмас. Бундан ташқари, катта ҳажмли бундай танкларни темир йўл орқали ташишда муаммолар бўлиши мумкин». 

The Guardian ва Bloomberg ҳам шундай фикрга эга. Уларнинг ёзишича Буюк Британия Challenger 2 танкларини етказиб бериш ҳақидаги қарори билан Германияга босим ўтказиши мумкин. Бу давлат шу вақтгача Leopard 2 танкларини Украинага етказиб беришдан бош тортиб келаётган эди.