Хитой билан урушда АҚШ снарядлари бир ҳафта ичида тугайди — WSJ

АҚШ ҳарбий саноати Хитойга қарши узоқ давом этадиган кенг кўламли урушга тайёр эмас. Бунга Россиянинг Украинага бостириб кириши оқибатлари далолат беради, деб ёзди The Wall Street Journal.

Нашрнинг қайд этишича, Америка Иккинчи жаҳон урушидан кейинги Европадаги энг йирик урушда Украинага катта ёрдам кўрсатган. Бироқ, чўзилиб бораётган можаро ҳарбий компанияларнинг арсеналларни тезроқ тўлдириш имконияти йўқлигини кўрсатган. Бу эса Қўшма Штатлардаги мавжуд қурол-яроғ захираларининг кескин қисқариши билан боғлиқ «стратегик хавф» борлигини кўрсатмоқда.

Газета Вашингтонда жойлашган Стратегик ва халқаро тадқиқотлар маркази катта вице-президенти Сет Жонс томонидан чоп этилган тадқиқотга таянмоқда.

Нашрга берган интервюсида таҳлилчи ҳозир Америка ҳарбий саноати худди тинчлик давридаги каби ишлаётганини таъкидлаган. Юқори мартабали америкалик ҳарбийлар ва расмийларга кўра, Хитой билан эҳтимолий можаро юзага келса, АҚШ армиясининг ўқ-дорилари тезда тугайди.

Ҳинд-Тинч океанида Хитой билан юзага келиши мумкин бўлган можаро Украинада бўлиб ўтаётган қуруқликдаги урушдан фарқ қилади, аммо АҚШ барибир катта миқдорда қурол ишлатиши керак бўлади.

Таҳлилчининг сўзларига кўра, ҳарбий саноатдаги муаммолар туфайли, «АҚШ узоқ муддатли можарода иштирок этишда қийинчиликка дуч келади».

Бу муаммонинг яққол кўрсаткичи сифатида Жонс Украинага етказиб берилган Javelin танкка қарши тизимлари билан боғлиқ вазиятни келтирмоқда. Унинг сўзларига кўра, ўтган йилнинг август ойидан бери Украина Қуролли кучлари Америка саноати 7 йил ичида ишлаб чиқаришга қодир бўлган миқдордаги тизимларни олган.

Бундан ташқари, Украинага етказиб берилган Stinger зенит-ракета комплекслари миқдори сўнгги 20 йил ичида бошқа мамлакатларга экспорт қилинган ҳажмга тенг. Шунингдек, АҚШ Украинага бир миллиондан ортиқ 155 мм снарядларни етказган, оқибатда ўз захираларини «паст» даражага туширган.

Жонс АҚШ ҳукуматига умумий эҳтиёжларини қайта кўриб чиқиш ва қуролларнинг стратегик захирасини яратишни тавсия қилмоқда.