Бразилия Украинада тинчликка эришиш форматини таклиф қилди

Бразилия президенти Луиз Инасиу Лула да Силва 30 январь, душанба куни унинг мамлакати Украинага Германия томонидан берилган Gepard ўзиюрар зенит қурилмалари (ЎЗҚ) учун снарядларни етказиб бермаслигини айтди. Бразилияга расмий ташриф билан келган Германия канцлери Олаф Шольц Бразилия раҳбариятидан шундай таъминотни сўраган.

Шольц билан қўшма матбуот анжуманида да Силва Россиянинг Украинага бўлган тажовузини тўғридан тўғри қоралашдан ҳам қочди. Бразилия раҳбари фақатгина Москва бошқа давлат ҳудудига ҳужум қилиб, «классик хатога йўл қўйди» ва бу билан «нотўғри» ҳаракат қилди, деган фикрни билдирди. Унинг таъкидлашича, можаронинг асл сабаблари унга унчалик аниқ эмас.

Шу билан бирга, да Силва ҳар икки томондан тинчлик йўли билан келишув бўйича «жуда кам» таклифларни эшитганини таъкидлади. У Россия ва Украина ўртасидаги тинчлик музокараларида воситачилик қилишни таклиф қилиб, келишув учун янги кўп томонлама формат зарурлигини таъкидлади. Бразилия президенти Украинада тинчликка эришиш учун бошқа давлатлар билан ҳамкорлик қилишда давом этишини қўшимча қилди. У, хусусан, март ойига мўлжалланган Пекинга ташрифи чоғида ушбу мавзуни муҳокама қилиш ниятида.

Бразилиядан олдин Германия канцлери Аргентина ва Чилига ҳам ташриф буюрган. Бу икки давлатнинг президентлари ҳам Шольцга Украинани қўллаб-қувватлашни, жумладан, қурол-яроғ етказиб беришни кучайтиришга ваъда беришдан бош тортдилар. Бироқ, да Силвадан фарқли ўлароқ, улар Россия агрессиясини аниқроқ қораладилар.

Шу билан бирга, 29 январь куни Аргентинага ташрифи чоғида Шольц Европа Иттифоқи ҳамда Аргентина, Бразилия, Парагвай, Уругвай ва Венесуэлани ўз ичига олган Mercosur ўртасидаги иқтисодий ҳамкорликни кенгайтиришга чақирди (Венесуэланинг аъзолиги 2017 йилдан номаълум муддатга тўхтатилган). Берлин Жанубий Америка мамлакатлари демократик ҳукуматлари билан муносабатларни мустаҳкамлаш орқали Германиянинг Хитойдан хомашё етказиб беришга қарамлигини камайтиришни кутмоқда, дейди таҳлилчилар.