Ўзбекистонда Венгрия компаниялари учун алоҳида саноат зонаси ташкил этилади

Ўзбекистон инвестициялар, саноат ва савдо вазири Лазиз Қудратов Венгрия ташқи ишлар ва ташқи иқтисодий алоқалар вазири Петер Сийярто билан учрашди.

Фото: Dunyo

Инвестициявий ҳамкорлик ва саноат кооперациясини ривожлантириш учун салмоқли салоҳият мавжудлиги таъкидланди. Томонлар Венгрия ТИВ ҳузуридаги Саноат паркларини ривожлантириш Миллий агентлиги билан биргаликда Ўзбекистонда Венгрия компаниялари учун алоҳида саноат зонасини ташкил этиш чораларини кўришга келишиб олди.

Мулоқот чоғида икки мамлакат пойтахтлари ўртасида ҳафтасига тўрттагача рейс ташкил этиш имкониятлари ҳам кўриб чиқилди.

Венгрия ОТP банкининг Ўзбекистон бозорига муваффақиятли кириб келгани юқори баҳоланди. Банк Ўзбекистонда янги компанияларни жалб қилиш ва қўшма лойиҳаларни молиялаштириш орқали фаолиятини кенгайтиришга қизиқаётганлиги таъкидланди.

Учрашув якунлари бўйича томонлар кўп қиррали ҳамкорликни янада ривожлантиришга ўзаро содиқлигини билдирдилар ва жорий йилнинг биринчи ярмида Будапешт шаҳрида Иқтисодий ҳамкорлик бўйича Ўзбекистон-Венгрия Ҳукуматлараро комиссиясининг 8-йиғилишини ва бизнес-форумни ўтказишга келишиб олди.