Россиянинг нефть ва газ экспортидан даромади 40 фоизга камайди

Ғарб санкциялари ва нархларнинг юқори чегараси жорий этилиши туфайли Россиянинг 2023 йил январида нефть ва газ экспортидан даромадлари ўтган йилнинг январига нисбатан қарийб 40 фоизга қисқарди, деб ёзади Reuters 28 февраль, сешанба куни Халқаро энергетика агентлиги маълумотларига таяниб.

Жорий йилнинг январь ойида Россиянинг нефть ва газ экспортидан тушган даромади 18,5 миллиард долларни ташкил қилди, бу Москванинг Украинага бостириб киришидан бир ой олдин олган 30 миллиард доллардан 38 фоизга кам, деб ёзади Reuters.

Халқаро энергетика агентлиги ижрочи директори Фотиҳ Биролнинг сўзларига кўра, бунга Ғарбнинг Россия энергия экспортига қарши санкциялари сабаб бўлган. «Биз нефть ва газ даромадларидаги бу пасайиш келгуси ойларда кескинроқ бўлишини кутамиз. Технология ва инвестициялардан фойдаланиш имконияти йўқлиги сабабли ўрта муддатли истиқболда янада жиддийроқ бўлади», деди Бирол Reuters агентлигига. У «Катта еттилик» (G7) нарх чегарасини жорий қилгани туфайли Россиянинг Urals нефти Brent нефтига нисбатан катта чегирма билан сотилаётганини таъкидлади.

Ўтган йили нефть ва газ сотишдан қарийб 11,6 триллион рубль (146 миллиард евро) даромад олган Кремль бу йил бюджет тақчиллигини қоплаш учун халқаро захираларни сотишни бошлашга мажбур бўлди, дея қайд этади Reuters.

Европа Иттифоқининг Россия нефть маҳсулотларини денгизга етказиб беришни тақиқлаши 5 февралдан кучга кирди. 2022 йил 5 декабрдан бошлаб Россиянинг Европа Иттифоқига нефть етказиб беришига эмбарго амал қиляпти. Шу билан бирга, Европа Иттифоқи ва «Катта еттилик» мамлакатлари учинчи давлатларга сотиладиган Россия нефтининг бир баррелига 60 доллар, Россия нефть маҳсулотларига эса хомашё турига қараб бир баррель учун 45 ва 100 доллар миқдорида нарх чегарасини белгилади.