Францияда россиялик олигархнинг вилласи хатловга олинди

Францияда россиялик олигарх Виктор Рашниковга тегишли эканлиги айтилаётган Мовий қирғоқ, Франция Риверасидаги 23 миллион евролик вилла хатловга олинди. Мамлакатда Россия олигархларига нисбатан жами 17 та иш тергов қилинмоқда.

Фото: SÉBASTIEN BOTELLA/NICE MATIN/BESTIMAGE

Францияда суд илк бор россиялик олигархга тегишли бўлган виллани жиноий иш доирасида хатловга олди. Гап Магнитогорск металлургия комбинати директорлар кенгаши раиси Виктор Рашников ҳақида кетмоқда, дея хабар беради Le Monde газетаси 1 март, чоршанба куни. Вилланинг нархи 23 миллион еврога баҳоланмоқда, у Ницца яқинидаги Сен-Жан-Кап-Ферра қирғоқбўйи коммунасида жойлашган.

Газетанинг ёзишича, вилла 2022 йил октябр ойида Париж прокуратурасининг уюшган жиноятчиликка қарши кураш билан шуғулланувчи бўлими - Junalco сўровига кўра хатловга олинган. Терговчилар вилла сотилаётганини аниқлаган. Шу билан бирга, сотувчи, Швейцария компанияси Панамада рўйхатдан ўтган йирикроқ компанияга тегишли. Junalco бу тузилмалар Рашников, шунингдек, вилланинг харидори, Россия фуқароси билан боғлиқ деб ҳисоблайди. Қиймати 17 миллион евролик (барча солиқ ва йиғимлар тўланганидан кейин) битим охир-оқибат музлатиб қўйилди.

2022 йил 15 мартда олигарх Россиянинг Украинага бостириб киришидан сўнг Европа Иттифоқи санкциялари остида қолганидан сўнг, Мовий қирғоқдаги Рашниковнинг яна учта уйига эгалик ҳуқуқи маъмурий жиҳатдан музлатиб қўйилган. Бироқ ўшанда Сен-Жан-Кап-Феррадаги вилла Франция ҳуқуқ-тартибот идоралари ходимларининг эътиборига тушмаган, чунки у Рашниковнинг мулки деб эълон қилинмаган, деб ёзади Le Monde хабардор манбага таяниб.

Нашрнинг ёзишича, Францияда Россия олигархларига нисбатан пул ювиш бўйича жами 17 та иш тергов қилинмоқда.