Губернатор Усснинг ўғлига Италиядан қочишга «опергруппа» ёрдам берган - ОАВ

Италиялик терговчилар Красноярск губернатори ўғлига ёрдам берган 4-5 кишини аниқлади. Италия расмийлари Усснинг қочиб кетишига Россия махсус хизматларининг алоқадорлигини текширмоқда, деб хабар берди La Repubblica. 

Италиялик терговчилар Красноярск губернатори Артем Усснинг ўғлига Миланда уй қамоғидан қочишга ёрдам берган 4-5 кишининг шахсини аниқлади, деб ёзади 12 апрель, чоршанба куни La Repubblica газетаси. Нашр маълумотларига кўра, Усснинг қочишида камида ўн киши бўлган «опергруппа» иштирок этган. Терговчиларнинг фикрича, операциянинг ўзида олти ёки етти нафар иштирокчи бўлган. 

Терговга маълум бўлишича, бу одамлар Уссга бир неча соат ичида Миландан Италиянинг Триест шаҳрига етиб боришига ёрдам беришган ва йўлда бир нечта машинани алмаштирган. У ерда Усс сохта ҳужжатлар ёрдамида Словения чегарасини кесиб ўтган, шундан сўнг Сербияга кетган ва у ердан Россияга учиб кетган.

2022 йил 17 октябрда Артем Усс Туркияга учиб кетмоқчи бўлган Милан аэропортида АҚШ томонидан ҳибсга олиш ордери асосида ушланган эди. Америка расмийлари Красноярск ўлкаси губернатори ўғлини санкцияларни бузиш ва пул ювишда айбдор деб ҳисоблаяпти.

2022 йил 28 октябрда Москванинг Мешчанский суди Артем Уссни уюшган жиноий гуруҳ таркибида пул ювиш бўйича қўзғатилган иш доирасида сиртдан ҳибсга олди. Россия ҳукумати унинг экстрадициясини талаб қилишини билдирди.

21 март куни Милан апелляция суди кичик Уссни АҚШга экстрадиция қилишни маъқуллади. Эртаси куни Италиянинг La Stampa газетаси ўша пайтда уй қамоғида бўлган эркак электрон билагузугини синдириб, Милан чеккасидаги ижарага олган квартирасини ташлаб кетгани ҳақида хабар берди.