«Бу яхши» — АҚШ Зеленский ва Си ўртасидаги суҳбатга муносабат билдирди 

АҚШ Украина президенти Володимир Зеленский ва Хитой раҳбари Си Жинпинг ўртасидаги телефон суҳбатини олқишлади. 

«Биз буни яхши деб ҳисоблаймиз. Энди бу қандайдир мазмунли тинчлик учун ҳаракат, режа ёки таклифга олиб келадими, буни ҳозирча билмаймиз», деди Оқ уйнинг миллий хавфсизлик бўйича вакили Жон Кирби. 

«Биз узоқ вақтдан буён бу уруш тугашини хоҳлаётганимизни айтмоқдамиз», деди у ва агар Россия Украинадан ўз қўшинларини олиб чиқса, «дарҳол» тугатилиши мумкинлигини қўшимча қилди. 

«Агар музокаралар орқали тинчлик ўрнатиладиган бўлса, олдин президент Зеленский бунга тайёр бўлиши, буни кучли позициядан амалга ошириши керак. Биз адолатли тинчликка эришиш учун ҳар қандай саъй-ҳаракатларни албатта олқишлаймиз, агар бу тинчлик адолатли, барқарор ва ишончли бўлса. Агар украиналиклар ва президент Зеленский шахсан бунга ҳаракат қилмаса ва қўллаб-қувватламаса, у барқарор ёки ишончли бўлмайди», деди Кирби. 

26 апрель куни Володимир Зеленский ва Си Жинпинг телефон орқали мулоқот қилди. Суҳбатдан кейин Зеленский ҳудудий компромисс эвазига тинчлик ўрнатиб бўлмаслигини айтди. Зеленскийнинг матбуот котиби эса Украина ва Хитой тинчлик режаларининг «кесишиш нуқталари» борлигини маълум қилди.