Франциядаги тартибсизликлар Швейцариягача етиб борди

Лозаннада юзга яқин ўсмир полиция билан тўқнашган. 7 нафар шахс, жумладан, 6 нафар вояга етмаган қўлга олинди.

Фото: AP

Полициячи томонидан 17 ёшли ўсмир отиб ўлдирилганидан сўнг Францияни қамраб олган тартибсизликлар Швейцариягача етиб борди, деб хабар бермоқда 2 июл, якшанба куни AFP. Шанба куни кечқурун Лозанна марказида ижтимоий тармоқлардаги қўнғироқлардан сўнг юздан ортиқ ўсмир ва ёшлар йиғилди – улар дераза ойналарини синдириб, полициячиларга тош отди. Швейцария полицияси маълумотларига кўра, 7 киши, жумладан, 6 нафар вояга етмаган қўлга олинган. Жабрланганлар ҳақида хабар берилмаган.

3 июл куни Франция президенти Эммануэл Макрон Франция парламенти депутатлари ва тартибсизликлардан жабр кўрган 220 та шаҳар ва коммуна мэрлари билан учрашмоқчи. Мамлакатдаги вазият туфайли у Германияга душанбага белгиланган ташрифини кейинга қолдирди. Намойишларга полициячи 17 ёшли ўсмирни отиб ўлдиргани сабаб бўлган.

Расмий версияга кўра, йигит машина рулида бўлиб, полициячининг талабига биноан тўхташдан бош тортган, шунинг учун унга қарата ўт очилган. Ҳуқуқ-тартибот идоралари воқеанинг барча ҳолатларини аниқлаш учун тергов бошлади. Ўсмирни отган полициячи ҳибсга олинган. У қасддан одам ўлдиришда айбланяпти.

Ҳар куни тартибсизликлар туфайли қўлга олинганлар сони юзлаб кишига етди – якшанбага ўтар кечаси камида 719 киши ушланди. Шу билан бирга, оммавий ахборот воситалари тартибсизликларнинг сўнгги кечасини нисбатан “сокин” деб атаган ва Нантер масжидида ўтказилган видолашув маросимида ҳеч қандай ҳодиса қайд этилмаган.

Франциядаги тартибсизликлар фонида барча маданий тадбирлар бекор қилинган ва жамоат транспорти тўхтатилган, унга қарши курашга 45 минг полициячи жалб қилинган. Бироқ, Парижда фавқулодда ҳолат жорий этиш режалаштирилмаган, деди пойтахт префекти.