«ПСЖ» ва «Бавария»да кореяликлар. Сўнгги трансфер хабарлари

Ли Кан Ин расман «ПСЖ»да

Париж клуби Ли Кан Ин трансферини эълон қилди. 22 ёшли жанубий кореялик яримҳимоячи «ПСЖ»га 22 миллион еврога тушди, у билан 2028 йилга қадар шартнома имзоланган.

Ли Кан Ин ўтган  мавсумда «Мальорка» сафида 39 ўйинда иштирок этиб, «гол плюс пас» тизимида 6+6 кўрсаткичини қайд этган.

Французлар жамоаси учун янги маркетинг кенгликлари очилди: Ли — Париж клубига келган илк жанубий кореялик бўлди. Шундай экан, бу трансфер тарихга кирди.

«Бавария» ҳимоячисини «ПСЖ»га сотди

«ПСЖ» расмий сайтида Мюнхеннинг «Бавария» клубидан ҳимоячи Люка Эрнандес сотиб олингани ҳақида хабар берилди. Франция миллий жамоасига номзод бўлган 27 ёшли футболчи билан беш йиллик шартнома имзоланган. ОАВ маълумотига кўра, Эрнандеснинг трансфери суммаси 47 миллион еврони ташкил этган.

Эрнандес 2019 йилдан буён «Бавария» сафида ўйнаб келаётганди, у немис клубида 107 ўйинда майдонга тушиб, икки гол урган, Чемпионлар лигаси, клублар ўртасидаги жаҳон чемпионатида ғолиб бўлган, Германиянинг тўрт карра чемпионига айланган. Клубда раҳбарият ўзгаргач, у ватанига қайтишга қарор қилди.

«ПСЖ»нинг яна бир топ-трансфери

Бунгача Милан Шкриньяр ва Марко Асенсиони эркин агент мақомида сафига қўшиб олган «ПСЖ»нинг навбатдаги трансфери катта сумма эвазига амалга ошди. Клуб «Спортинг»нинг таянч яримҳимоячиси Мануэл Угарте учун 60 млн евро тўлади. 22 ёшли уругвайлик билан беш йиллик шартнома тузилган. «ПСЖ»да Угарте 4 рақамли футболкада ўйнайди. Шу тариқа, Париж клубининг ёздаги трансферлари сони бештани ташкил этмоқда.

«Арсенал» етакчиси Хаби Алонсо жамоасига ўтди

Гранит Жака АПЛдан кетиши ҳақида олдиндан маълум эди, бу маълумот расман тасдиқланди. Швейцариялик 30 ёшли яримҳимоячи «Байер»га ўтди ва 2028 йилга қадар шартнома имзолади. Трансфернинг тахминий суммаси — 25 млн евро.

Жака ўтган мавсумда Англия чемпионлиги учун «Манчестер Сити»нинг асосий рақобатчиси бўлган «Арсенал»нинг муҳим футболчиларидан бири эди. Аммо клуб Деклан Райс трансферини ҳал қилганидан кейин у Лондонда қолмасликка қарор қилди. У энди Леверкузен жамоаси бош мураббийи бўлиб ишлаётган Хаби Алонсо билан ҳамкорлик қилади.

Симеоне «Челси» афсонасини қўлга киритди

Сесар Аспиликуэтанинг ҳам Лондондан кетиши ҳақида анчадан буён гапириб келишарди, аммо у бошқа йўналишда ҳаракатланиши кутилганди. «Челси» афсонасини «Барселона» билан боғлашаётганди, аммо испаниялик футболчи якунда Мадридда пайдо бўлди. Энди Аспиликуэта Диего Симеоне бошқарувидаги «Атлетико»да ўйнайди. Испания миллий жамоаси аъзоси бўлган 33 ёшли ҳимоячи эркин агент сифатида қўлга киритилди ва у билан 1+1 схемасида шартнома тузилди.

Давид де Хеанинг «МЮ»даги 12 йиллик фаолияти тугади

Футболчи ва клуб шартномани узайтириш борасида узоқ вақт музокара олиб боришди ва шартнома муддатининг охирги кунларида ҳам шартнома шартлари муҳокама қилинди. Лекин маоши миқдори икки баробар камайтирилган шартномани испаниялик футболчи рад этди ва эркин агентга айланди.

Ушбу дарвозабон инглиз клубидаги 12 йиллик фаолиятида АПЛ, Европа лигаси, Англия кубоги ва Англия лига кубоги ғолиби бўлган. Энди у ҳам Саудия Арабистонига йўл олиши кутилмоқда

«МЮ» янги дарвозабон олмоқда

«Манчестер Юнайтед» Давид де Хеа ўрнига ким келишини ҳал қилиб бўлган. De Telegraaf маълумотига кўра, клуб «Интер»дан Андре Онанани трансфер қилишга яқин. Томонлар 27 ёшли камерунлик трансферини 55 млн евро эвазига расмийлаштириш арафасида. Дарвозабоннинг ўзи ёки беш йиллик, ёки «4+1» схемасидаги шартномага эга бўлади. Онана 2022 йил ёзидан буён «Интер» сафида ўйнаб келаётганди, энди дунёнинг энг кучли лигасига йўл олмоқда.

«Интер» «Бавария» дарвозабонини қўлга киритмоқчи

Андре Онанани «Манчестер Юнайтед»га сотаётган «Интер» янги дарвозабон изламоқда. Sky Sports маълумотига кўра, «Бавария»дан Ян Зоммер олиб келиниши мумкин. 34 ёшли дарвозабон мюнхенликлар сафига ўтган мавсум ўртасида келиб қўшилган ва бундеслигада 19 ўйин ўтказган.

«Бавария»дагилар бу таклифни ўйлаб кўрмоқда, чунки уларда икки вариант бор — Мануэл Нойер жароҳатидан тузалгунича Зоммерни қолдириш ёки уни қўйиб юбориб, «Валенсия»нинг гуржистонлик посбони Георгий Мамардашвили билан шартнома имзолаш.

Инсайдер Фабрицио Романо хабарига кўра, Зоммер ҳам «Интер»га ўтишни истамоқда. У «Интер»да асосий дарвозабон бўлишдан умид қилмоқда.

«Бавария» Ким Мин Жэ трансферини ҳал қилган

Фабрицио Романо мюнхенликлар «Наполи» ҳимоячиси Ким Мин Жэни 50 миллион еврога сотиб олиш масаласини ҳал қилгани ҳақида ҳам хабар берган. 26 ёшли футболчи янги клуби учун тиббий кўрикдан ўтиб бўлган. Тез фурсат ичида у билан 2028 йилга қадар шартнома тузилгани эълон қилиниши кутилмоқда.

Якунланган мавсумда ушбу жанубий кореялик футболчи А сериянинг 35 ўйинида майдонга тушиб, «Наполи» билан скудеттони қўлга киритди. Унга «Манчестер Сити» ҳам даъвогарлик қилаётганди.

«Милан» «Челси»дан яна бир футболчи олмоқда

Фабрицио Романо «Милан» ва «Челси» 24 ёшли вингер Кристиан Пулишич трансфери борасида келишиб олганини хабар қилди. Клублар барча ҳужжатларни расмийлаштириб бўлишган. Трансфер қиймати 20 млн еврони ташкил этади, яна бонуслар кўзда тутилган. Пулишич билан шартнома 2027 йилга қадар бўлади, унга йилига 4 млн евро миқдорида маош тўланади.

Америкалик футболчи «Челси»нинг асосий таркибидан тушиб қолганди. У ўз вақтида истиқболли вингер сифатида харид қилинганди, аммо бу умид оқланмади. 2022/2023 йиллар мавсумида Пулишич «Челси» сафида барча турнирлар доирасида 30 ўйинда майдонга тушиб, бир гол ва икки пас билан чекланди. Энди у «Милан» сафида яна топ-даражага қайтишга уриниб кўради.

«Ювентус» Лукакуга қизиқмоқда

Муваффақиятсиз мавсум ўтказганига қарамай, Ромелу Лукаку ҳамон гранд клублар радарида турибди. The Athletic маълумотига кўра, «Челси»нинг 30 ёшли форварди учун курашга «Ювентус» қўшилган. Туринликлар «Интер»нинг музокарадан чиқишини кутмоқда - миланликлар клуби белгиялик футболчини бир йил олдин ижарага олганди ва ҳозирда ижарани кейинги мавсумга ҳам узайтиришга ҳаракат қилмоқда, Лондон клуби эса уни сотишни истайди.

Лондон клуби Ромелу учун 45 миллион евро олишни кўзлаган. Лукакуга Саудия Арабистони жамоалари ҳам қизиқмоқда. Якунланган мавсумда форвард А сериянинг 25 ўйинида қатнашиб, 10 гол урди ва 6 голга узатма берди.

Мане яна Фирминога жамоадош бўладими?

Афтидан, «Ал-Аҳли» хўжайинлари «Ливерпул»нинг афсонавий жуфтлигига мухлис бўлишган ва уни яна тиклашга қарор қилишган. Николо Ширанинг ёзишича, Роберто Фирмино билан шартнома имзолаб бўлган саудияликлар клуби энди Садио Манега кўз тикишган. 31 ёшли вингернинг «Бавария»даги ишлари ўхшамаяпти ва мюнхенликлар уни «Ливерпул»дан трансфер қилинганига бир йил бўлмай сотишга рози бўлиши мумкин.

Мане учун таклиф Европа мезонлари бўйича юқори, Саудияники бўйича анча камтарроқ. Хабарга кўра, Садиога уч йиллик шартнома ва 20 млн евро миқдорида йиллик маош таклиф этилмоқда. Шунга қарамай, келишув яқинлиги айтилмоқда. Дарвоқе, Мане таклифни қабул қилса, нафақат Фирмино билан, балки Сенегал миллий жамоасидаги шериги — дарвозабон Эдуард Менди билан ҳам жамоадош бўлади.

«МЮ» даниялик янги юлдуз билан келишувга эришди

Расмус Ҳойлунд — якунланган мавсумда кашфиётга айланган ҳужумчилардан бири бўлди. У «Аталанта» сафида шундай ўйин кўрсатдики, ёзда топ-клублар ўзи учун навбатга туришига эриша олди. «МЮ» эса бу навбатда биринчи. Фабрицио Романонинг тасдиқлашича, инглизлар 20 ёшли ҳужумчининг ўзи билан келишиб олган ва энди трансфер борасида италян клуби раҳбарияти билан келишиши қолган.

Ҳойлунд бўйича «Аталанта»га расмий таклиф йўлланган. Сўнгги хабарларга кўра, «МЮ» столга 60 млн евро қўйган ва жавоб кутмоқда. Бу трансфер доирасида «Манчестер Юнайтед» ҳужумчиси Мэйсон Гринвуд «Аталанта»га ижарага берилади. «Даниялик Ҳоланд» деб аталаётган футболчи эса Англияда норвегиялик Ҳоланд билан рақобатлашади.

Уокер келажаги борасида бир қарорга кела олмаяпти

Инсайдер Фабрицио Романонинг хабарига кўра, «Манчестер Сити» ҳимоячиси Кайл Уокер фаолиятини давом эттириш борасида танлов қаршисида қолган. 33 ёшли футболчининг «Сити» билан шартномаси муддати 2024 йил ёзида тугайди — ва «шаҳарликлар» унга шартномани янгилашни таклиф этишмоқда.

Бунга параллел тарзда Уокерга «Бавария» қизиқмоқда. Романонинг маълумотига кўра, ҳимоячи — Томас Тухел учун биринчи галдаги нишон. Энди Англиянинг беш карра чемпиони, 2022/23 йилги мавсумда требл соҳиби бўлган футболчи якуний қарорга келиши ва таклифлардан бирини қабул қилиши керак.

«Милан» яна бир ҳужумчи трансферини тайёрламоқда

Стефано Пиоли жамоаси Сандро Тоналининг «Ньюкасл»га сотувидан кейин бойиб қолган. Энди «Милан» таркибни кучайтириш учун инвестиция киритмоқда. The Athletic хабарига кўра, «россонерилар» «Вилярреал»га нигериялик яримҳимоячи Самуэл Чуквезе учун 25 млн евро таклиф қилмоқда. Футболчининг ўзи италян гранди билан оғзаки келишувга эришиб бўлган. Унинг «Вилярреал» билан шартномаси тугашига бир йил қолган. Шундай экан, испан клуби уни кейинги йил текинга қўйиб юборишидан кўра, ҳозир сотиб юбориши ҳақиқатга яқинроқ.