Гуржистон Америка автомобилларининг Россия ва Беларусга экспортини тақиқлади

1 августдан Гуржистон Россия ва Беларусга Америка автомобилларини экспорт ва реэкспорт қилишни тақиқлади, 26 сентябрдан эса худди шундай қоидалар Европа Иттифоқи автомобилларига нисбатан қўлланади, деб ёзади Business Media.

Фото: Shutterstock

Ушбу чора-тадбирлар Европа Иттифоқининг ўн биринчи санкциялар пакетининг бир қисми сифатида киритилмоқда.

У қабул қилинишидан олдин, Европа Иттифоқидан Россияга қиймати 50 минг евродан ортиқ бўлган автомобилларни етказиб бериш тақиқланган эди, кейин тақиқ двигатель ҳажми 1900 куб см (1,9 л)дан ортиқ бўлган автомобилларга, шунингдек, барча электр ва гибрид транспорт воситаларига ҳам қўлланди.

Аввалроқ Европа Иттифоқи Россияни Украинада уруш бошлагани сабаб жазолаш мақсадидаги санкцияларининг 11-пакетини эълон қилганди.

Янги чекловлар тўплами бунга қадар ўрнатилган санкцияларни четлаб ўтишга қарши чораларни ўз ичига олади. Эндиликда Евроиттифоқнинг тегишли органлари санкция остидаги товарларнинг Россияга учинчи давлатлар орқали кириб боришига қарши тақиқларни кенгайтириши мумкин бўлди.

Янги санкцияларга Россиянинг бир қатор компаниялари ва шахслари, шунингдек, хорижий компаниялар ҳам киритилди.