АҚШ Вакиллар палатаси Исроилга ёрдам кўрсатишни маъқуллади

АҚШ Конгрессининг Вакиллар палатаси 2 ноябр, пайшанба куни Исроилга Фаластиннинг ҲАМАС ташкилотига қарши курашида ёрдам бериш учун республикачилар томонидан таклиф этилган қонун лойиҳасини маъқуллади. Қонун лойиҳасини қўллаб-қувватлаш учун қуйи палатанинг 226 нафар аъзоси овоз берди, 196 нафари қарши чиқди. Энди ҳужжат кўриб чиқиш учун Сенатга тақдим этилади, у ерда қабул қилинса, АҚШ президенти Жо Байденга имзолаш учун юборилади.

Вакиллар палатасида республикачилар томонидан 30 октябрда тақдим этилган қонун лойиҳаси янги спикер Майк Жонсон давридаги илк йирик қонунчилик ташаббуси бўлиб, фақат Исроилга ёрдам кўрсатишни ўз ичига олган. Ҳужжат, жумладан, Исроилнинг «Темир гумбаз» ва «Довуд чопони» ҳаво мудофаа тизимларини харид қилиш учун 4 миллиард доллар, шунингдек, «Темир нур» тизимини ривожлантириш учун 1,2 миллиард доллар ажратишни назарда тутади.

Сенаторлар ва Байден қонун лойиҳасига қарши чиқди

АҚШ Конгресси юқори палатасидаги демократлар ва республикачилар аввалроқ Вакиллар палатаси республикачиларининг Украинага ёрдам бермасдан Исроилга ёрдам кўрсатиш режасига шубҳа билдирган эди. Сенатдаги республикачилар етакчиси Митч Макконнелл 31 октябр куни журналистлар билан суҳбатда тўрт минтақа – Украина, Исроил, Тайван ва АҚШнинг Мексика билан чегарасига тегишли чораларни қонун лойиҳасига киритиш зарурлигини таъкидлади. Ўз навбатида, Сенатдаги демократик кўпчилик етакчиси Чак Шумер Вакиллар палатасида тақдим этилган қонун лойиҳасини «бемаъни таклиф» деб атади. Агар у қуйи палата томонидан қабул қилинса, Сенатда ҳеч қандай имконияти бўлмайди, деди у журналистларга.

Оқ уй АҚШ президенти Жо Байден ҳар икки палатада овоз беришдан ўтиб, унинг иш столига етиб борса ҳам, ҳужжатга вето қўйиши ва имзолашдан бош тортиши ҳақида огоҳлантирди. «Ушбу қонун лойиҳаси Исроил учун ёмон, Яқин Шарқ ва ўз миллий хавфсизлигимиз учун ёмон», - дея Reuters Оқ уй маъмурий-бюджет бошқармаси вакилининг сўзларидан иқтибос келтирган.