АҚШ Сенати ҳукуматни вақтинчалик молиялаштиришни маъқуллади

Шатдауннинг олдини олишга қаратилган қонун лойиҳасида Исроил ва Украинага қўшимча ёрдам кўрсатиш ҳақидаги моддалар мавжуд эмас. У аввалроқ Вакиллар палатаси томонидан қўллаб-қувватланган эди.

Фото: Kun.uz

15 ноябр, чоршанба куни АҚШ Сенати федерал ҳукумат фаолиятини 18 ноябрдан тўхтатиб қўйиш (шатдаун)нинг олдини олиши керак бўлган Америка маъмуриятини вақтинчалик молиялаштириш тўғрисидаги қонун лойиҳасини қўллаб-қувватлади. CNN маълумотларига кўра, ташаббус учун 87 нафар овоз берилган, 11 депутат қарши чиққан.

Аввалроқ, 14 ноябр куни ушбу қонун лойиҳаси АҚШ Конгресси Вакиллар палатаси томонидан маъқулланган эди. Энди у имзолаш учун АҚШ президенти Жо Байденга юборилиши керак.

Шатдауннинг олдини олиш учун иккита янги дедлайн

Ҳужжатда Энергетика вазирлиги ҳамда ҳарбий қурилиш, фахрийлар ишлари, транспорт, уй-жой ва бошқа масалаларга масъул идораларни молиялаштиришни 2024 йил 19 январга қадар, давлат бошқарувининг бошқа соҳаларига тегишли муассасаларни эса 2024 йил 2 февралгача узайтириш таклиф этилган. Шу тариқа, қонун чиқарувчилар келаси йилги ҳукумат ишини молиялаштириш бўйича якуний ҳужжатни қабул қилиш учун иккита янги дедлайнга эга, дея қайд этади CNN.

Таъкидланишича, АҚШ Конгрессининг иккала палатаси томонидан маъқулланган қонун лойиҳасида Исроил ва Украинага ёрдам кўрсатиш учун қўшимча маблағ ажратишга оид моддалар мавжуд эмас.

Турли федерал идораларнинг 2024 йил учун бюджетлари 11 ноябргача тасдиқланиши керак эди. Аммо сўнгги сессияда демократлар назоратидаги Сенат ва республикачилар кўпчиликни ташкил этувчи Вакиллар палатаси ўртасидаги қарама-қаршилик бунга тўсқинлик қилди.

АҚШда эҳтимолий шатдауннинг оқибатлари

Ҳукумат иши тўхтаб қолиши 1,5 миллионга яқин АҚШ ҳукумати ходимларини уйларига маошсиз юбориш билан таҳдид солади. Шатдаун, шунингдек, федерал мулкка тегишли бўлган аксарият объектлар, жумладан, миллий боғлар ёпилишини ва ҳаво ҳаракатини бошқариш чекланишини англатади, бу америкаликларнинг саёҳат режаларига таъсир кўрсатади.