Уруш яна камида икки ой давом этади — Исроил мудофаа вазири

Исроил ва ҲАМАС ўртасидаги сулҳ қисқа муддат бўлиши таъкидланмоқда.

Фото: Reuters

Исроил Мудофаа вазири Йоав Галлант 23 ноябр куни сулҳ қисқа муддат бўлишини айтди.

Унинг сўзларига кўра, Исроил ва ҲАМАС ўртасидаги оташкесим келишувидан кейин олдинда камида яна икки ойлик уруш бор.

«Бу (сулҳ) қисқа муддат бўлади, шундан сўнг шиддатли жанглар давом этади ва биз гаровга олинганларнинг кўпроғини қайтариш учун душманга босим ўтказамиз. Яна камида икки ойлик жанглар кутилмоқда», деб унинг сўзларини келтирди Haaretz газетаси.

Аввалроқ, Исроил ва ҲАМАС ўртасидаги оташкесим ҳақидаги келишув 24 ноябр (жума) куни соат 7:00 дан (Тошкент вақти билан 10:00) кучга кириши ҳақида хабар берилди.

Қайд этилишича, ҲАМАС гаровга олинганларнинг дастлабки 13 нафарини қўйиб юборади. Шундан сўнг, Исроил фаластинлик маҳбусларни ҳам озод қилади. Сулҳ 4 кун амал қилади.

Тайёрлаган Сардор Юсупов

#Исроил #Фаластин #Ҳамас

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.