АҚШ Венесуэла раҳбарига яқин ҳисобланган колумбиялик тадбиркорни озод қилди

АҚШ Венесуэла билан маҳбуслар алмашинуви доирасида 20 декабр, чоршанба куни Венесуэла раҳбари Николас Мадурога яқин бўлган колумбиялик тадбиркор Алекс Саабни озод қилди. АҚШ расмийларига кўра, келишув Қатар воситачилигида амалга оширилган.

Каракас бунга жавобан 20 венесуэлалик сиёсий маҳбус ва АҚШнинг 10 фуқаросини қамоқдан қўйиб юборди. Бундан ташқари, Венесуэла томони АҚШ ҳарбий-денгиз кучларидаги йирик коррупция можаросида иштирок этган тадбиркор Леонард Фрэнсисни экстрадиция қилди.

Каракас Саабнинг озод этилишини олқишлаб, буни «Венесуэла дипломатиясининг ғалабаси» деб атади. Тадбиркорнинг Венесуэлага келиши маҳаллий телевидение орқали намойиш этилди. 

Мадуро оиласи учун пул ювиш айблови бўйича қидирувда бўлган

Сааб 2020 йил июн ойида Эронга йўл олган шахсий самолёти Кабо-Вердега ёнилғи қуйиш учун қўнганида қўлга олинган эди. Норозилик белгиси сифатида Венесуэла ҳукумати мухолифат билан музокараларни тўхтатди. Расмий Каракасга кўра, Сааб инсонпарварлик миссиясини бажарган. Хабар қилинишича, Алекс Сааб ҳукуматнинг мунозарали Clap дастури учун Венесуэла ҳукуматига миллионлаб долларлик озиқ-овқат сотган. 

Сааб АҚШ ва Колумбия томонидан пул ювиш ва бошқа жиноятларда айбланиб, Мадуро оиласи ва унинг шерикларига Венесуэлада очарчиликдан азият чекаётганлар учун озиқ-овқат ёрдамида юзлаб миллион доллар ишлаб олиш ва бу маблағларни чет элга олиб чиқишда ёрдам бергани учун қидирувга берилган эди. Америкалик терговчиларнинг фикрича, Сааб Мадуро оиласи ва венесуэлалик юқори мартабали амалдорларнинг ноқонуний операциялари ҳақида кенг маълумотга эга.