АҚШ Навалнийнинг колониядаги шароитларидан чуқур хавотирда

Америка Қўшма Штатлари россиялик мухолифатчи Алексей Навалнийнинг Ямало-Ненец автоном округидаги колонияда ҳибсдаги шароитларидан чуқур хавотирда. Бу ҳақда 25 декабр, душанба куни АҚШ Давлат департаменти маълум қилди.

Америка ташқи сиёсат департаменти сиёсатчининг шериклари у билан икки ҳафтадан кўпроқ вақт давомида алоқа бўлмаганидан кейин унинг жойлашган жойини аниқлай олгани ҳақидаги хабарларни олқишлади. «Бироқ биз жаноб Навалнийнинг аҳволи ва унинг рухсат этилмаган ҳибсда сақланаётган шароитларидан чуқур хавотирдамиз», — дейилади АҚШ Давлат департаменти баёнотида.

Расмий Вашингтон Навалнийнинг шериклари ва оила аъзоларига қўшилиб, «уни зудлик билан ва сўзсиз озод этишни талаб қилмоқда» ва «Россия ҳукуматини мустақил овозларга қарши репрессия кучайишини тўхтатишга чақирмоқда».

Навалний 19 кундан кейин бошқа колониядан топилди

25 декабр куни эрталаб Навалнийнинг матбуот котиби Кира Ярмиш у Ямало-Ненец автоном округи Харп қишлоғидаги 3-сонли ахлоқ тузатиш колониясида (ИК-3) экани ҳақида хабар берган эди. «Бугун унга адвокат ташриф буюрди. Алексей яхши», - деб ёзди Ярмиш X ижтимоий тармоғида.

Бунгача Навалнийнинг шериклари ва қариндошлари 6 декабрдан бери у билан боғлана олмаётган ва Владимир вилоятидаги 6-сонли ахлоқ тузатиш колонияси ходимлари Навалний «энди у ерда рўйхатда йўқлигини» маълум қилганди. Мухолифатчи сиёсатчининг тарафдорлари ижтимоий тармоқларда #ГдеНавальный ҳештегини йўлга қўйишди, Европа Иттифоқи, АҚШ ва БМТ Инсон ҳуқуқлари бўйича Олий комиссари бошқармаси Россияни у ҳақида зудлик билан маълумот беришга чақирди. Коррупцияга қарши курашиш жамғармаси (ФБК) директори Иван Ждановнинг қайд этишича, унинг ҳамкорлари Навалнийни топиш учун 618 та сўров юборган.

Навалнийнинг яна бир иттифоқчиси Леонид Волковнинг таъкидлашича, мухолифатчи бўлган колония «қутб доирасидан ташқарида» жойлашган. «Бу колонияга боришнинг деярли имкони йўқ, у ерга хат жўнатишнинг ҳам имкони йўқ. Бу дунёдан изоляциянинг мумкин бўлган энг юқори даражаси - ҳамма нарса шу учун бошланган», - дея изоҳ берди Волков.

Россияда Навалнийнинг жиноий таъқиб қилиниши

Навалний 2021 йил февралида «Ив Роше» иши бўйича фирибгарликда айбдор деб топилгач, Россия расмийлари томонидан колонияга жўнатилган эди. Ўшанда сиёсатчига 2 йил-у 8 ой қамоқ жазоси берилди. 2022 йил март ойида Навалний яна фирибгарликда, кейин эса судяни ҳақорат қилишда айбдор деб топилиб, 9 йилга қаттиқ тартибли колонияга ҳукм қилинган эди. 

2023 йил августида Алексей Навалний Москва шаҳар суди томонидан «экстремистик ҳамжамият»ни ташкил этганликда айбланиб, махсус режимли колонияда 19 йилга озодликдан маҳрум этилди. Расмийларга кўра, сиёсатчи асос солган Коррупцияга қарши кураш жамғармаси шундай ҳамжамият бўлган.