Исроил маҳбус алмашиш ҳақидаги ҲАМАС таклифини қабул қилмади

ҲАМАС Исроилга Қатар ва Миср воситачилари орқали гаровдагилар ва маҳбусларни алмашиш бўйича янги келишув таклиф қилди, бироқ Тел-Авив буни рад этди. Бу ҳақда Исроил матбуотига таяниб, Anadolu ёзди. 

Қайд қилинишича, ҲАМАС режаси уч босқичда амалга оширилишини кўзда тутган. Биринчисида Исроил қамалдаги Ғазо секторидан қўшинларини олиб чиқишни бошлаши ва 40 нафар маҳбусни озод қилиши керак эди. Режанинг тўлиқ амалга оширилиши Ғазода асирга олинган исроиллик ҳарбий хизматчиларнинг озод қилинишини ва «урушнинг тугашини» ўз ичига олган. 

Нашрнинг ёзишича, Исроил ҳарбий вазирлар маҳкамаси ҲАМАС таклифини кўриб чиқиб, уни рад этишга қарор қилган ва воситачилардан «мақбулроқ таклифлар» билдиришни сўраган. Музокаралар тўлиқ тўхтатилмади, аммо жиддий силжиш йўқ, дейилади хабарда. 

24 ноябр куни Ғазода эълон қилинган «гуманитар пауза» доирасида 81 нафар исроиллик аскар 240 нафар фаластинлик маҳбус эвазига озод қилинган эди. Тел-Авив яна 129 нафар исроиллик Ғазода гаровда қолаётганини даъво қилмоқда. 

Исроил томони маҳбусларни алмашиш келишуви доирасида «гуманитар пауза» таклиф қилмоқда, бироқ, ҲАМАС ҳужумлар бутунлай тўхтатилиши керак бўлган оташкесимни талаб қилмоқда.