Россия Олий суди Алексей Навалнийнинг иккита даъвосини рад этди

Сиёсатчи колониянинг айрим ички қоидаларини бекор қилишни талаб этганди. Бошқа нарсалар қаторида, Навалний овқатланиш учун атиги 15 дақиқа ажратилган қоидага қарши чиқди.

Фото: Mediazona

Россия Олий суди 11 январ, пайшанба куни таниқли мухолифатчи Алексей Навалнийнинг ахлоқ тузатиш колониясидаги қамоқ шароитлари билан боғлиқ иккита даъвосини рад этди, деб хабар қилди сиёсатчининг ҳамкорлари Telegram-каналда. Биринчи суд жараёнида Навалний колонияда атиги 15 дақиқа овқатланишга рухсат берувчи қоидаларга эътироз билдирган. Иккинчи даъво камера типидаги хонада иккитадан ортиқ китобни ва жазони ўташ камерасида биттадан ортиқ китобни сақлаш ҳуқуқига тегишли эди.

Даъвонинг овқатланиш вақтига оид қисмида Навалний мисол тариқасида аввал пишириб, кейин истеъмол қилиниши керак бўлган қуруқ «Доширак» лағмонини келтирди. «Катта кружкаларда олиб келинадиган қайноқ сув шунчаки совишга улгурмайди. Сабзавотларни ювиш, тозалаш ва қошиқ билан кесишда ҳам муаммолар бор», деб ёзади «Команда Навального».

Навалний яна жазо камерасига юборилди

9 январ куни ижтимоий тармоқларда Алексей Навалний яна етти кунга жазо камерасига жўнатилгани маълум бўлди. Бу мухолифатчи Ямало-Ненец автоном округидаги колонияга етказилганидан кейин мажбурий карантиндан чиққанидан сўнг содир бўлди. Сиёсатчининг постида таъкидланганидек, жазо камерасига жойлаштирилишига унинг «ўзини тегишли шаклда таништиришдан бош тортгани, тарбиявий ишларга реакция билдирмаётгани, ўзи учун тегишли хулосалар чиқармаётгани» сабаб бўлган.

«Полярный волк» колониясига кўчирилишидан олдин сиёсатчи Владимир вилояти Мелехово қишлоғидаги ИК-6да эди. Навалний у ерда жазо камерасига 23 марта юборилган. Бунинг сабаблари, масалан, тугма тўғри тақилмагани ва панжарани ювишдан бош тортиш эди. Жазо камерасида сақлаш шароитлари қатъийлиги билан ажралиб туради. Маҳкумларга посилка олиш, сайрга чиқиш тақиқланган, уларга чойшаб берилмайди.

Алексей Навалний 2023 йил августида экстремистик фаолиятда айбланиб, махсус режимли колонияга 19 йилга қамалган эди. Навалний ўзини айбсиз, ҳукмни эса - сиёсий сабабларга кўра чиқарилган деб ҳисоблайди. Инсон ҳуқуқлари ташкилотлари Навалнийни сиёсий маҳбус сифатида тан олган.