Нетаняҳу Фаластин давлатчилиги ғоясини рад этади

Исроил бош вазири Бинямин Нетаняҳу Ғазо секторидаги ҳарбий операция якунланганидан кейин Фаластин давлатини яратиш имкони йўқлигини айтди ва бу позициясини АҚШ расмийларига етказди.

«Келажакдаги ҳар қандай келишувларга кўра... Исроилга Иордан дарёсининг ғарбий қисмидаги барча ҳудудда хавфсизлик назорати керак. Бу [Фаластиннинг] суверенитет ғоясига зиддир. Хўш, биз нима қила оламиз? Бош вазир дўстларга «йўқ» дейишга қодир бўлиши керак», деди у.

Шу билан бирга, The Times of Israel нашрининг ёзишича, Нетаняҳу бундай сиёсат Исроилнинг араб давлатлари билан муносабатларини яхшилашда давом этишига тўсқинлик қилмаслигини таъкидлаган.

У, шунингдек, Исроил ҲАМАС гуруҳи тўлиқ мағлуб бўлгунга қадар ва мақсадларига эришмагунча унга қарши курашни давом эттиришини айтди, гарчи «ғалаба учун кўп ойлар керак бўлса-да». Унинг сўзларига кўра, Ғазодан Исроилга ҳеч қачон таҳдид келмаслигини таъминлаш керак.

Нетаняҳунинг таъкидлашича, операцияни ҳозир тўхтатиш «Исроилнинг кейинги авлодлари хавфсизлигига зарар етказади» ва мухолифларга мамлакат заифлигини кўрсатади.

18 январ куни Давосдаги форумда сўзга чиққан АҚШ давлат котиби Энтони Блинкен Фаластин давлатининг ташкил этилиши Яқин Шарқдаги вазиятни барқарорлаштириши ва узоқ муддатда Исроил хавфсизлигини кафолатлашини тушунтирган эди. Шу билан бирга, давлат котибининг ишонтиришича, Исроилнинг бошқа минтақа давлатлари билан интеграциялашуви Эрон ва унга бўйсунувчи кучларни, жумладан ҳусийларни ҳам яккалаб қўяди. Шу билан бирга, Блинкен Исроил бу имкониятдан фойдаланиш кераклиги ёки йўқлигини ўзи ҳал қилиши лозимлигини таъкидлади.