Европарламент Россиядаги сайловларга кузатувчиларни юбормайди

Европарламент Россияга 15—17 март кунлари бўлиб ўтадиган президентлик сайловларида кузатувчи сифатида боришга қарор қилиши мумкин бўлган депутатлардан узоқлашди ва ҳеч бир европалик парламентарийга бундай ваколатлар бермаганини таъкидлади.

«Европа парламенти ушбу сайлов жараёнини кузатмайди ва шунинг учун жараённинг ўзини ҳам, унинг натижаларини ҳам изоҳламайди. Европарламентнинг ҳеч бир аъзоси Россия Федерацияси, Қрим ва бошқа эгаллаб олинган ҳудудларда ушбу сайлов жараёнини Европарламент номидан кузатиш ҳуқуқига эга эмас» дейилади 13 март, чоршанба куни чоп этилган пресс-релизда.

Ҳужжатда таъкидланишича, агар Европарламентнинг ҳар қандай аъзоси ушбу сайловлар бўйича фикр билдиришга қарор қилса, улар буни ўз ташаббуси билан қилади ва «ҳеч қандай ҳолатда ўз баёнотлари ёки ҳаракатларида Европарламентга таянмаслиги керак». 

Евроиттифоқ сайловлар қонунийлигини тан олмасликка чақирди 

Аввалроқ Россия мухолифати вакиллари ва бир қатор европалик сиёсатчилар Европа Иттифоқини Россиядаги президентлик сайловлари натижаларини тан олмасликка чақирган эди. Шундай қилиб, россиялик мухолифатчи сиёсатчи Алексей Навалнийнинг беваси Юлия Навалная The Washington Post газетаси рукнида амалдаги раҳбарият қонунийлигини инкор этиш бутун дунё учун ҳам, Россия фуқаролик жамияти учун ҳам, ҳали ҳам Кремлга содиқ элита учун ҳам муҳим сигнал бўлишини таъкидлади. 

Феврал ойи бошида 15 мамлакатдан 20 дан ортиқ депутатлар Европа Иттифоқи, унинг институтлари ва аъзо давлатларни Россия Федерациясидаги президентлик сайловларининг қонунийлигини тан олмасликка чақирди. Мурожаат Эстония депутати Рихо Террас томонидан илгари сурилган. Ҳужжатда режимнинг Украина ҳудудининг бир қисмини эгаллаб олгани ва аннексия қилгани, энди у ерда овоз беришни режалаштираётгани таъкидланади. 

Германиядан уч депутат сайлов кунлари Россияга келди 

Россия ҳукумати бир неча бор россияпараст партиялардан бўлган европалик сиёсатчиларни «кузатувчи» сифатида сайловларга жалб қилган. Хусусан, 2024 йилда, немис ОАВ хабар қилганидек, Бавария парламентининг ўнг қанот популистик «Германия учун муқобил» партиясидан уч нафар аъзо шу мақсадларда Россияга келди: Андреас Юрка, Елена Роон ва Улрих Зингер. 

Депутатларнинг сафари, жумладан, ўз партияларида ҳам танқид қилинди. Tagesschau маълумотига кўра, «Германия учун муқобил» раҳбарияти депутатларга «Россия Федерациясига 2024 йил 13-19 март кунлари режалаштирилган сафарга бормасликни қатъий тавсия қилган».