Байден пенсияда блогерлик қилишини айтиб ҳазиллашди

АҚШ президенти Жо Байден пенсияга чиққанидан сўнг инфлюенсерга айланиши ва ўз блогини юритиши мумкинлигини айтди. Бу ҳақда у блогерлар билан учрашувда маълум қилди.

Фото: Reuters

Америка етакчисининг сўзларига кўра, бошқа соҳалар билан қиёслаганда интернет нашри йўналишига қизиқадиган одамлар кўпроқ.

«Сизнингча, нафақага чиққанимдан кейин қаерга бораман? Менда контактлар бор... Иш излаётганим учун ҳам сизларни Оқ уйга чақирдим», — деб ҳазиллашди Байден.

Июл ойи охирида 81 ёшли Байден 2024 йил ноябрида бўлиб ўтадиган президентлик сайловларидан номзодини қайтариб олганди. Демократлар янги номзод сифатида амалдаги вице-президент Камала Ҳаррисни танлади.

Жо Байден президентлик пойгасидан чиқиш тўғрисидаги қароридан кейинги илк интервюсида Демократик партия ўзининг асосий вазифасини бажаришига халал бермаслик учун сайловдан номзодини олишга қарор қилганини айтганди. Унинг фикрича, бу вазифа — Доналд Трампни енгиш ва АҚШда демократияни сақлаб қолиш ҳисобланади.

Ўз навбатида Трамп яқинда Илон Маск учун берган интервюсида «Байденда 30 йил аввал IQ даражаси жуда паст бўлгани, ҳозир умуман йўқ бўлиши мумкинлигини» айтди. Собиқ президент Байденнинг ташқи сиёсатини ҳам қаттиқ танқид қилиб, буни «сўлиган сиёсат» деб атади.

Суҳбат давомида Трамп Камала Ҳаррисни «учинчи даражали», «қобилиятсиз» ва «сўл радикал» деб атади. Трамп унинг Байден ўрнига Демократик партиядан номзод бўлишини «тўнтариш» деб баҳолаган.

#Жо Байден

Kun.uz янгиликларини Google News'да кузатинг

+ Обуна бўлиш