Мадейра оролидаги ёнғин: Португалия ЕИдан ёрдам сўради

Португалия Европа Иттифоқи бўйича ҳамкорларидан Мадейра оролидаги ЮНEСКОнинг Бутунжаҳон мероси рўйхатига киритилган дафна ўрмонини йўқ қилиб юбориши мумкин бўлган йирик ўрмон ёнғинини ўчиришда ёрдам сўради. «Яқин соатларда биз Европа Иттифоқининг фуқаролик ҳимояси механизмини ишга туширамиз», — дея 21 август, чоршанба куни Португалиянинг Lusa ахборот агентлиги ҳукуматдаги манбасидан иқтибос келтирди.

Мадейра оролидаги ёнғин 14 август куни Рибейра-Брава муниципалитетида бошланган, шундан сўнг кучли шамол туфайли у қўшни Камара-ди-Лобуш ва Понта-ду-Сол муниципалитетларига, автоном вилоят пойтахтидан ғарбга ва Фуншал денгиз порти томонга тарқалди. «Коперник» сунъий йўлдошларидан олинган маълумотларга кўра, 20 август ҳолатига кўра, ёнғин натижасида оролнинг 4392 гектар майдони ёниб кетган. 

Маҳаллий ҳокимият маълумотларига кўра, олов тарқалиши хавфи туфайли 200 га яқин одам ёнғиндан эвакуация қилинган. Ҳалок бўлганлар ва қурбонлар ҳақида маълумотлар йўқ. Минтақавий фуқаро муҳофазаси хизмати президенти Антонио Нунес Португалиянинг RTP радиосига берган интервюсида ёнғиндан етказилган зарар ҳали катта эмаслигини, аммо ёнғин шиддат билан қўриқланадиган ўрмон ҳудудига яқинлашаётганини айтди.