Норвегия Туркияга нисбатан қурол эмбаргосини бекор қилади

Норвегия ташқи ишлар вазири Эспан Барт Эйде 2019 йилдан бери амалда бўлиб келаётган Туркияга нисбатан қурол эмбаргосини ечиш ниятини маълум қилди. Бу ҳақда Туркия ТИВ матбуот котиби Онжу Кечели ўзининг Х ижтимоий тармоғидаги саҳифасига ёзиб қолдирди.

Унинг сўзларига кўра, Норвегия вазири бу ҳақда туркиялик ҳамкасби Ҳоқон Фидан билан телефон орқали суҳбатда маълум қилган.

«Ўз навбатида вазир Фидан мазкур қарордан мамнунлигини айтиб, бундай чеклов чоралари шериклик руҳига тўғри келмаслигини таъкидлади», — дейди Кечели.

Норвегия Туркия мудофаа саноати маҳсулотлари экспортига 2019 йилда, Туркия Қуролли кучлари Сурия шимолида аксилтеррор ҳарбий операция бошлаганидан кейин чекловлар жорий этганди. «Тинчлик манбаи» операцияси YPG террорчилик ташкилотига қарши, шунингдек, мамлакат жанубий чегараларидаги хавфни бартараф этиш мақсадида ташкил этилган.

Операция давом этаётган вақтда Чехия, Италия, Испания, Белгия, Канада, Нидерландия ва Буюк Британия ҳам Туркияга қарши шу каби чораларни қўллаган эди. Ҳозирда Туркияга қўйилган қурол етказиб беришга оид эмбаргонинг бир қисми ечилган, мамлакатнинг Европа Иттифоқи давлатлари билан ҳамкорлиги ривожланишда давом этмоқда.