Германия Украинага энергетика инфратузилмаси учун 170 млн ажратади

Бундестаг томонидан Украина Қуролли кучларига 400 миллион евро миқдорида маъқулланган ёрдамдан ташқари, Украина энергетика секторини тиклаш учун имкон қадар тезроқ Киевга 170 миллион евро ўтказилади.

Фото: Yevhenii Zavhorodnii

Германия энергетика инфратузилмасини тиклаш учун Украинага 170 миллион евро ажратади. 26 сентябр, пайшанба куни Бундестаг Киевга ҳукумат аввалроқ сўраган қўшимча ҳарбий ёрдамни маъқуллади.

Украинани қайта тиклаш учун 170 миллион евро

Германия ҳукумати вакили Штеффен Хебештрайт Ню-Йоркда БМТ Бош ассамблеяси доирасида Украина бўйича ўтказилган йиғилишдан сўнг Киевга энергетика инфратузилмасини тиклаш учун яна 170 миллион евро ажратилишини маълум қилди. Унинг эслатишича, Россия зарбалари Украина шаҳарлари ва энергетика соҳасига катта зарар етказган, шу боис пул имкон қадар тезроқ ажратилади.

«Иштирокчилар Россиянинг давом этаётган тажовузи қаршисида Украина билан бирдам эканликларини ҳамда зарур бўлган вақтгача Украинага ҳарбий, молиявий ва гуманитар ёрдам кўрсатишда қатъийликларини тасдиқладилар», — дейилади баёнотда.

400 миллион евро ҳарбий ёрдам

397,3 миллион евро миқдоридаги маблағ қўшимча ҳаво ҳужумидан мудофаа ускуналари, танклар, учувчисиз учоқлар, ўқ-дорилар ва Украинани ҳимоя қилувчи кучларни самарали мустаҳкамлаш учун эҳтиёт қисмларга сарфланади, дея хабар берди Германия ҳукумати. Германия бюджети билан боғлиқ қийинчиликларга қарамай, Украинага қўшимча ҳарбий ёрдам кўрсатиш учун Бундестагдан маъқуллашни сўраб, вазирлар маҳкамаси Россия Федерациясининг артиллериядаги устунлиги ва режалаштирилувчи бомбалардан фойдаланиши туфайли Украинада «катта моддий йўқотишларга» ишора қилди.

Германия Мудофаа вазирлигига кўра, 2024 йилнинг қолган ойларида жанг майдонидаги вазиятга таъсир қилиши учун қўшимча ёрдам Украинага «зудлик билан» ўтказилиши керак.