Ўзбекистондан Дания ва Норвегияга миллий маҳсулотлар экспорти йўлга қўйилади

Ўзбекистон элчихонаси (қароргоҳи Швеция пойтахтида) ходимлари томонидан Даниянинг Орхус ва Норвегиянинг Осло шаҳарларида ватандошларимиз иштирокида давра суҳбатлари ва сайёр консуллик қабуллари ташкил этилди.

Фото: Дунё

Учрашувлар давомида фуқароларни қийнаб келаётган масалалар муҳокама қилиниб, уларни ижобий ҳал қилиш бўйича тегишли маслаҳатлар берилди, ватандошларнинг бу борадаги таклиф ва ташаббуслари қўшимча ўрганиш учун қабул қилинди.

Дания ва Норвегиядаги ўзбек маданий марказлари билан яқин ҳамкорликни йўлга қўйиш орқали ватандошларга, айниқса ёш авлодга, ўзбек тилини ўқитиш, бой миллий маданий меросни ва қадриятларни тарғиб қилиш ва сингдириш, бу йўналишда маданий кечалар, кўргазма ва ярмаркалар ташкил этиш ва бошқа шу каби маърифий тадбирларни мунтазам ўтказиш бўйича келишиб олинди.

Дипломатлар, шунингдек, Скандинавия мамлакатларида тадбиркорлик ва бизнес фаолияти билан шуғулланиб келаётган ватандошлар кўмагида Ўзбекистондан Дания ва Норвегияга миллий маҳсулотлар экспортини йўлга қўйиш ва кенгайтириш имкониятлари ҳам муҳокама қилдилар.

#Норвегия #Дания