Россияда чет элликлар билан сохта никоҳ қуришга қарши қонун қабул қилинди

Энди вақтинчалик яшаш рухсатномасини олиш учун чет элликлар камида уч йил давомида россиялик билан турмушда яшаган бўлиши керак. Ажралиш ёки никоҳ ҳақиқий эмас деб топилган тақдирда, рухсатнома бекор қилинади.

Фото: ТАСС

Россияда хорижликлар билан сохта никоҳларни қонунийлаштиришга қарши қонун президент Владимир Путин томонидан имзоланди. Ҳужжат норматив-ҳуқуқий ҳужжатларни нашр этиш порталида жойлаштирилган.

Янгиликлар орасида, хусусан, соддалаштирилган тартибда вақтинчалик яшаш рухсатномасини (ВЯР) олиш учун Россия фуқароси билан камида уч йил никоҳда бўлиш талаби бор. Бундан ташқари, ВЯР берилган шахснинг никоҳи бекор қилинган ёки судда ҳақиқий эмас деб топилган тақдирда, ВЯР бекор қилинади.

Агар Россияда доимий яшовчи чет элликнинг Россия фуқаролигига эга фарзанди бўлса, унинг ота-онасидан бири Россия фуқаролигига эга бўлса, у ҳолда ота-онасининг камида 3 йил бирга яшагани судда тасдиқлансагина ВЯР берилади. Агар чет эл фуқароси ота-оналик ҳуқуқидан маҳрум бўлса ёки оталикни аниқлаш тўғрисидаги ёзув бекор қилинса, ВЯР бекор қилиниши мумкин.

Қонун эълон қилинган кундан бошлаб 90 кун ўтгач кучга киради.

Шу йил сентябр ойида Россия Ички ишлар вазирлиги расмий вакили Ирина Волк чет элликлар миграция мақоми ва фуқароликни олиш учун россияликлар билан сохта никоҳ қураётгани ҳақида хабар берди. Унинг сўзларига кўра, 2024 йил январидан сентябрига қадар суднинг никоҳни ҳақиқий эмас деб топиши асосида вақтинчалик пропискани бекор қилиш тўғрисида 107 та, пропискани бекор қилиш тўғрисида 75 та қарор қабул қилинган.

#никоҳ #миграция #Россия