Сурхондарёда машина мактаб ўқувчисини уриб юборди

1-синф ўқувчиси бўлган бола кўчанинг белгиланмаган қисмидан ўтаётганда уни Nexia уриб юборган.

Фото: Видеодан кадр

Сурхондарё вилояти Бандихон туманида ўлим билан боғлиқ йўл-транспорт ҳодисаси содир бўлди. Бу ҳақда вилоят ИИБ ЙҲХБ ахборот хизмати хабар бермоқда.

Ҳодиса 2024 йил 12 ноябр куни соат 8:00 ларда содир бўлган. Бандихон тумани Чинор маҳалласидан ўтувчи 4Р-100 автомобил йўлида 32 ёшли ҳайдовчи бошқарувида бўлган Nexia йўлнинг белгиланмаган жойидан кесиб ўтаётган 7 ёшли болани уриб юборган.

Оқибатда, тумандаги 9-мактабнинг 1-синфида таҳсил олаётган бола оғир тан жароҳатлари олиб туман шифохонасида вафот этган.

Қайд этилишича, бола ўқийдиган мактабда ЙҲХБ мутасаддилари, маҳалла аҳолиси, вафот этган боланинг ота-онаси иштирокида муҳокама йиғилиши ўтказилган.