Австриянинг OMV компанияси «Газпром» билан шартномани бекор қилди

Австриянинг OMV Gas Marketing & Trading GmbH компанияси Россиянинг «Газпром Экспорт» компанияси билан 2006 йилда тузилган ва 2040 йилгача амал қилиши керак бўлган газ етказиб бериш бўйича шартномани бекор қилди, деб хабар берди компания 11 декабр, чоршанба куни.

Шартномани муддатидан олдин бекор қилиш сабаби «Газпром Экспорт» томонидан шартнома мажбуриятларининг кўплаб жиддий бузилиши», деб тушунтирди Австрия компанияси ва бекор қилиш дарҳол кучга киришини қўшимча қилди.

OMV таъкидлаганидек, «Газпром» етказиб бериши тўхтатилиши билан боғлиқ барча мумкин бўлган хавфлар «сўнгги уч йил ичида муқобил газ манбалари орқали тўлиқ диверсификация қилинди». Ноябр ойида концерн Норвегиядан қувур орқали газ етказиб беришни таъминлагани ва суюлтирилган газнинг узоқ муддатли қўшимча ҳажмлари бўйича шартномалар имзолагани ҳақида хабар берган эди. Шу билан бирга, Германия ва Италияда ушбу мамлакатлардаги денгиз терминалларидан қайта газланган СТГни мамлакатга ташиш учун транзит имкониятлари ҳисобга олинган.

«Газпром» Австрияга газ етказиб беришни тўхтатди

Россиянинг «Газпром» давлат концерни Австрияга газ етказиб беришни тўхтатмоқда. Австриянинг OMV нефт-газ компанияси «Газпром»дан 16 ноябрдан бошлаб газ етказиб бериш бутунлай тўхтатилиши ҳақида билдиришнома олди, дейилади OMV 15 ноябр куни эълон қилган баёнотда. 

Бир кун олдин OMV «Газпром экспорт» билан арбитраж ишида ғалаба қозонганини эълон қилди. Компания суд қароридан сўнг Россия томонидан фоизлар ва суд харажатларини қўшимча равишда 230 миллион евро миқдорида ундириш ниятида эканлигини маълум қилди. OMV 2022 йил кузида газ етказиб бериш тўхтатилгани сабабли 2023 йил бошида «Газпром экспорт»га қарши даъво аризаси билан чиқди.

Суд қароридан кейин OMV «Газпром экспорт» билан шартнома муносабатларининг ёмонлашиши, жумладан, газ таъминоти тўхтатилишини истисно этмади. Ушбу баёнот фонида Европада газ нархи ўтган йил давомида энг юқори даражага етди.