Венгриянинг MOL компанияси Сербиядаги NIS’да “Газпром” улушини сотиб олади

Сербиянинг АҚШ санкциялари остига тушган нефт компаниясида “Газпром нефть” улушини MOL венгер компанияси сотиб олади. Битимда Абу-Даби нефт компанияси ҳам иштирок этиши мумкин.

Фото: Spasa Dakic/SIPA

Венгриянинг MOL Nyrt. компанияси ва “Газпром нефть” Сербиянинг нефтни қайта ишлаш компанияси — Naftna Industrija Srbije (NIS)даги Россияга тегишли улушни сотиб олиш–сотиш бўйича бўлажак шартноманинг асосий қоидаларини келишиб олди. Бу ҳақда душанба, 19 январ куни Белградда журналистларга Сербия тоғ-кон саноати ва энергетика вазири Дубравка Джедович-Ханданович маълум қилди.

Давлат телекомпанияси RTS келтирган вазир сўзларига кўра, музокаралар давомида Сербия ўз позицияларини яхшилашга эришган ва келгусида NIS’даги улушини 5 фоизга ошира олади. Бундан ташқари, битимга Abu Dhabi National Oil Co. (ADNOC) ҳам қўшилиши мумкин.

Хандановичнинг билдиришича, келишув якуний қарор қабул қилиниши учун АҚШ Молия вазирлигининг Чет эл активларини назорат қилиш бошқармаси (OFAC)га юборилади. Илгарироқ OFAC NIS акциядорларига Россия улушини сотиш бўйича музокаралар олиб боришга рухсат берувчи лицензия муддатини 24 мартгача узайтирган эди.

Ханданович харид қиймати ва улушлар тақсимотини ошкор қилмади. MOL матбуот релизида айтилишича, компания “Газпром нефть” билан NIS’нинг 56,15 фоиз акцияларини сотиб олиш бўйича мажбурият юклайдиган дастлабки келишувни имзолаган. “Газпром нефть” матбуот хизмати ҳам MOL билан Сербия компаниясидаги назорат пакетини сотишга доир келишув имзоланганини тасдиқлади.

2025 йил январ ойида NIS компанияси “Газпром”нинг устав капиталидаги улуши сабаб АҚШнинг санкция рўйхатига киритилган. Чекловлар октябрда кучга кирган. Ушбу санкциялар Хорватия орқали Адриатика қувур тармоғи (JANAF) бўйича нефт етказиб беришнинг тўхташига ва Панчево шаҳридаги нефтни қайта ишлаш заводида ишлаб чиқаришнинг тўхтаб қолишига олиб келган.

Хандановичнинг айтишича, MOL Панчеводаги НҚЗ (нефтни қайта ишлаш заводи)ни ёпмаслик, аксинча, ишлаб чиқаришнинг аввалги даражасини сақлаш ва эҳтиёжга қараб уни ошириш мажбуриятини ўз зиммасига олган.

Ҳозир NIS акцияларининг 44,9 фоизи “Газпром нефть”га тегишли. Яна 11,3 фоиз акция “Газпром”нинг инвестиция бўлинмаси мулкида. Сербия ҳукумати 29,9 фоиз акцияга эга. Қолган улушлар хусусий инвесторлар ва компания ходимларига тегишли.