Блинкен: Хитой Россияни ядровий қурол қўллашдан қайтарган

АҚШ Россия Украинага қарши уруш фонида ядровий қуролдан фойдаланиши мумкинлигидан «жуда хавотирланган». Бу ҳақда Давлат котиби Энтони Блинкен Financial Times’га берган интервюсида маълум қилди.

Унинг сўзларига кўра, АҚШ расмийларига Владимир Путин ядро қуролидан фойдаланиш вариантини кўриб чиқаётгандек туюлган. «Агар эҳтимоллик 5 дан 15 фоизга ошганида ҳам — бу жуда жиддий», деган Блинкен Вашингтон Путиннинг таҳдидларини қанчалик жиддий қабул қилгани тўғрисидаги саволга жавобан.

АҚШ давлат котибининг айтишича, Пекин Москвани қўллаб-қувватлашига қарамай, ядро қуролидан фойдаланиш эҳтимоли масаласида Хитой АҚШга ёрдам берган.

Блинкеннинг сўзларига кўра, Вашингтонда ХХР ҳукумати россияликлар билан боғланиб, уларни ядровий қуролдан фойдаланиш хавфидан огоҳлантирган, дея «ҳисоблашга асос бор». АҚШ давлат котибининг фикрича, бу Вашингтон Пекинни Москва ядровий қуролни космосга жойлаштирмоқчи экани ҳақидаги режаларидан хабардор қилганидан кейин содир бўлган бўлиши мумкин.

«Бизда Хитой Россия билан боғланиб, «бу ишни қилманглар», деганига ишонишимиз учун асос бор», — дейди Блинкен.

Financila Times’нинг қайд этишича, АҚШ президенти Жо Байден Киев сўраган айрим турдаги қуролларни беришдан бош тортишига Россия—Украина уруши эскалацияси хавфи сабаб бўлган.

Россия Украинага қарши кенг кўламли уруш бошлаганидан бери Кремл бир неча бор Украина ва Ғарбга ядровий қуролдан фойдаланиш билан таҳдид қилди. 2024 йил бошида Америка ОАВда Россия ҳукумати 2022 йил охирларида Украинага ядровий зарба бериш масаласини муҳокама қилгани тўғрисида хабарлар чиқди. Хусусан, бу ҳақда CNN телеканали АҚШдаги юқори мартабали амалдорларга таяниб хабар берди.

Ўтган йилнинг декабри бошларида Россия президенти Владимир Путин «Орешник» ракетаси пайдо бўлиши билан ядро қуролидан фойдаланиш зарурати сезиларли даражада камайганини айтганди. Унинг сўзларига кўра, янги қурол тизимлари мудофаа муаммоларини ҳал қилишда ядровий имкониятлар ўрнини босадиган даражада кучли. Энди ядровий доктринани такомиллаштириш эмас, балки «Орешник»ни мукаммаллаштириш керак бўлади.