Qanot Sharq авиакомпанияси бир қатор рейсларни бекор қилди

Бекор қилинган рейсларнинг аксарияти Россия шаҳарларига парвозлардир.

Фото: Qanot Sharq

Ўзбекистоннинг Qanot Sharq авиакомпанияси бир қатор рейслар, жумладан, Россияга парвозлар вақтинчалик бекор этилганини маълум қилди.

«Ҳурматли йўловчилар, 20 январдан 6 мартгача бўлган даврда А320 самолётларида амалга ошириладиган рейслар эксплуатация зарурати туфайли бекор қилинганини маълум этамиз», дейилади компания хабарида.

Бекор қилинган рейслар қаторида Тошкент, Самарқанд, Фарғона, Бухоро ва Москва (Домодедово аэропорти) ўртасидаги йўналишлар, шунингдек, Санкт-Петербург ва Нижний Новгородга рейслар бор.

Парвозларнинг тўлиқ рўйхати авиакомпания хабарида келтирилган.

Компания юзага келган ноқулайликлар учун йўловчилардан узр сўради ва чипталарни қайтариш ёки алмаштириш ҳақида маълумот олиш учун call-марказ билан боғланишни тавсия қилди.

Аввалроқ, Озарбойжоннинг AZAL авиакомпанияси Россиянинг 10 та шаҳрига парвозларни тўхтатган эди.

Шунингдек, FlyDubai (БАА), Turkmenistan Airlines, El Al (Исроил), Qazaq Air (Қозоғистон) авиакомпаниялари ҳам маълум муддатга Россияга парвозларни тўхтатди.

Тайёрлаган Сардор Юсупов

#Россия #авиакомпания #Qanot Sharq

25 декабр тонгида Бокудан Грознийга учган самолёт йўналишини ўзгартириб, Қозоғистоннинг Оқтов шаҳри аэропорти яқинида авариявий қўнишни амалга оширди. Авиаҳалокатда 38 киши ҳалок бўлди.