Панама Трампнинг таҳдидлари устидан БМТга мурожаат қилди

Панаманинг БМТдаги элчиси Элой Алфаро де Алба ташкилот бош котиби Антониу Гуттеришга мактуб йўллаб, АҚШ президенти Доналд Трампнинг Панама канали устидан назоратни қайтариб олиш тўғрисидаги режаларига эътибор қаратишни сўради. Бу ҳақда Reuters агентлиги хабар берди.

Алба ўз мактубида БМТ низомига кўра, мамлакатлар «халқаро муносабатларида ҳар қандай давлатнинг ҳудудий яхлитлиги ёки сиёсий мустақиллигига қарши куч ишлатиш билан таҳдид қилишдан тийилишлари керак»лигини таъкидлади.

Мактуб БМТ Хавфсизлик кенгашининг 15 аъзосига тарқатилган.

Декабр охирларида Трамп АҚШ Панама канали устидан назоратни қайтариб олиши мумкинлигини маълум қилганди (канал 1999 йилда Қўшма Штатлар томонидан Панамага топширилган). АҚШ президентининг сўзларига кўра, Панама каналдан фойдаланиш бўйича ҳаддан ташқари юқори тарифларни ўрнатган, Хитой бўлса унинг фаолияти режимига таъсир кўрсатмоқда. Трамп канал «бегоналар қўлига» тушиб қолишига йўл қўймасликка ваъда берган.

20 январ куни Трамп ўзининг инаугурация нутқида Панама каналининг топширилишини «аҳмоқона совға» деб атаган. Унинг фикрича, Панама каналини Хитой «бошқармоқда».

Панама канали — узунлиги 81,6 километр, эни 51 метрдан иборат. Панама канали Америка қитъасининг энг жанубий мамлакати Панамада жойлашган бўлиб, Атлантика океани (Кариб денгизи) орқали Тинч океани билан боғлаб туради. Дунёдаги денгиз савдоларининг 2,5 фоизи унинг ҳисобига тўғри келади — ҳар йили канал орқали 14 мингтагача кема ҳаракатланади. Панама канали АҚШга Осиёдан автомобиллар ва бошқа тижорий товарлар импортида, шунингдек, Америка товарлари, жумладан, табиий газ экспортида муҳим аҳамиятга эга. Reutersʼга кўра, Хитой канални назорат қилмайди ва бошқармайди, аммо Ҳонконгдаги CK Hutchison Holdings’нинг шуъба компанияси канал сувларида жойлашган иккита портни бошқаради.