Келлог: Трампнинг Украина бўйича режаси Мюнхенда тақдим этилмайди

АҚШ президентининг Украина ва Россия бўйича махсус элчиси Кит Келлог, ОАВ хабарларидан фарқли ўлароқ, келаси ҳафта Мюнхен халқаро хавфсизлик конференциясида Доналд Трампнинг Россиянинг Украинага қарши урушини тугатиш режасини тақдим этмаслигини айтди. Генерал Келлогнинг сўзларига кўра, режани Трампнинг ўзи тақдим этади. «Биз унга тайёрланишига ёрдам берамиз, аммо бу кейинги ҳафта бўлмайди», деди Келлог 6 феврал, пайшанба куни Nesmax.tv сайтига берган интервюсида.

Унинг қўшимча қилишича, у Европа етакчилари билан музокаралар ўтказишни режалаштирган, шундан сўнг бу суҳбатлар мазмуни ҳақида АҚШ президентини хабардор қилади ва Трамп жамоаси бу маълумотлардан келиб чиқади.

Бир кун аввал Bloomberg манбаларига таяниб, АҚШ иттифоқчилари Келлог Трампнинг Украинадаги урушни тугатиш режасини 14-16 феврал кунлари бўлиб ўтадиган Мюнхен хавфсизлик конференциясида тақдим этишини кутаётгани ҳақида хабар берди.

Келлогнинг ўзи ўша пайтда Мюнхен конференциясида иштирок этишини ва Трампнинг Украинадаги «қонли ва қиммат» урушни тугатиш мақсади ҳақида гапириш учун «имкониятни сабрсизлик билан кутишини» айтди.

Можарони музлатиш

Bloomberg ёзганидек, Трампнинг режаси можаронинг потенциал музлатилишини ва Россия қўшинлари томонидан ишғол қилинган Украина ҳудудини Украинага хавфсизлик кафолатлари билан «мавҳум ҳолатда» ушлаб туришни назарда тутади. Бу кафолатлар айнан қандай бўлиши аниқланмаган.

Келлогнинг ўзи аввалроқ Х ижтимоий тармоғида Мюнхен конференциясида иштирок этиши ва Трампнинг Украинадаги «қонли ва қиммат» урушни тугатиш мақсади ҳақида гапириш имкониятини «интиқлик билан» кутаётгани ҳақида ёзган эди. «Американинг биз билан ишлашга тайёр иттифоқчилари билан учрашаман», деб ёзган махсус вакил.

Аввалроқ Американинг NBC News телеканали ўз манбаларига таяниб, АҚШ президенти маъмурияти Украинадаги можарони қандай ҳал қилиш борасида иккига бўлингани ҳақида хабар берган эди. Трамп жамоасининг бир қисми Москвага Россиянинг олға силжишини тўхтатиш учун босим ўтказиш тарафдори, бу ғояни Келлог ва миллий хавфсизлик бўйича маслаҳатчи Майк Уолтц қўллаб-қувватлайди. Аммо Украинага ёрдамни қисқартиришни ёқлаётганлар ҳам бор. NBC Трамп жамоасидан ким бу ғояни қўллаб-қувватлашига аниқлик киритмади.