Песков: Киев музокараларда у ёки бу тарзда иштирок этади

Россия президенти матбуот котиби Дмитрий Песков Украина можарони ҳал қилиш бўйича музокараларда иштирок этишини маълум қилди, деб хабар бермоқда «Интерфакс» Россия давлат ахборот агентлиги 13 феврал, пайшанба куни. Шунга қарамай, Вашингтон музокаралар жараёнида Москванинг асосий «визависи» бўлиб қолмоқда. «У ёки бу тарзда, албатта, Украина музокараларда иштирок этади. Бу мулоқотнинг икки томонлама Россия-Америка йўналиши бўлади ва у, албатта, Украинанинг иштироки билан боғлиқ бўлади», — деди у.

Шу билан бирга, Кремл вакилининг айтишича, Путин ва Трамп ўртасидаги суҳбатда Украина президенти Володимир Зеленскийнинг ҳуқуқий мақоми муҳокама қилинмаган. Аввалроқ Россия президенти Зеленскийнинг «ноқонунийлиги» туфайли «ҳеч нарсага имзо чекишга ҳаққи йўқлигини» айтганди.

Умуман олганда, Песковнинг сўзларига кўра, Россия ва АҚШ президентлари ўртасидаги телефон суҳбати «конструктив, самарали ва самимий бўлган». «Трампнинг сўнгги муддатида ҳам улар ўта конструктив муносабатлар ўрнатган, улар ҳозиргача давом этмоқда. Улар икки президентга энг мураккаб муаммоларни конструктив муҳокама қилиш имконини беради», — дея қўшимча қилди у.

Украина музокараларида Европанинг иштироки муҳокама қилинмади

Трамп ва Путин ўртасидаги суҳбатда Россиянинг Украинага қарши урушини ҳал қилиш бўйича музокараларда европаликларнинг иштироки муҳокама қилинмади, деди Песков. «Кечаги суҳбатда Европа масаласи ҳеч қандай тарзда муҳокама қилинмади», дея қўшимча қилди у. Песковнинг сўзларига кўра, Европа давлатлари музокараларда «қандайдир тарзда ўз ўрнини эгаллаш учун Вашингтон билан гаплашиши» керак бўлади.