АҚШда ноқонуний мигрантлар оқими охирги 60 йилдаги энг паст даражада тушди

Доналд Трамп Оқ уйга қайтганидан кейин АҚШ чегарасини кесиб ўтувчи ноқонуний мигрантлар сони 90 фоизга камайди, деб хабар беради New York Post.

Қайд этилишича, феврал ойида чегарачилар кунига ўртача 359 нафар мигрантни қўлга олган — бу охирги 60 йил ичидаги энг паст кўрсаткичдир.

Трамп назоратни кучайтириш учун чегарага 1,5 минг ҳарбийни жалб этган ва Мексика президенти Клаудия Шейнбаум билан келишувга эришган.

ОАВ маълумотларига кўра, Вашингтон Мексика товарларига 25 фоизли бож жорий этиш билан таҳдид қилганидан кейин мамлакат мигрантлар оқимини тутиб қолиш учун 10 минг ҳарбийни чегарага юборган. Бундан ташқари, Трамп барча бошпана изловчилар ўз мақоми бўйича қарорни Мексика ҳудудида кутишларини йўлга қўйишни режалаштирмоқда.

Феврал бошидан бери АҚШда мамлакат қонунларини бузган ноқонуний мигрантларга қарши кенг кўламли рейдлар бошланган. Натижада, 11 минг киши қўлга олинган бўлиб, уларнинг бир қисми ҳарбий самолётларда депортация қилинган.

Жо Байден бошқаруви даври билан таққослаганда, АҚШда ноқонуний мигрантлар оқими кескин камайган. 2023 йилда чегарачилар кунига ўртача 5590 кишини ушлаган бўлса, 2024 йил бошида ушбу кўрсаткич 2872 кишини ташкил этган, ҳозирда — 369 кишига тушган.

Аввалроқ, АҚШ президенти Доналд Трамп мамлакатдаги мигрантлар билан боғлиқ вазиятга эътибор қаратиб, АҚШ-Мексика чегарасида фавқулодда ҳолат эълон қилган ва назорат-ўтказиш пунктларини ёпган эди. Шунингдек, у ноқонуний мигрантлар оммавий депортация қилинишини айтди. Мексика АҚШ ҳудудига ўтмоқчи бўлган ноқонуний мигрантлар учун асосий транзит мамлакати ҳисобланади.