Ўзбекистон компанияси Европа Иттифоқи санкцияларига дучор бўлди

Европа Иттифоқи Украинада уруш бошланганининг уч йиллиги муносабати билан Россияга қарши 16-санкция пакетини қабул қилди. Бу ҳақда ЕИ кенгашининг пресс-релизида айтилади.

48 нафар жисмоний ва 35 нафар юридик шахсга нисбатан чеклов чоралари қўлланган. Қайд этилганидек, улар Украинанинг ҳудудий яхлитлиги, суверенитети ва мустақиллигига путур етказувчи ёки таҳдид солувчи ҳаракатлар учун жавобгардир.

Санкциялар рўйхатига Ўзбекистоннинг Uzstanex компанияси ҳам киритилди.

Uzstanex компанияси StanexGroup ҳолдинги таркибига киради. Компания Ўзбекистон, Қозоғистон, Қирғизистон, Тожикистон ва Туркманистонда ускуналарни сотади ва созлайди.

Корхоналар ва ташкилотларнинг ягона давлат регистрига кўра, Uzstanex 2018 йил июл ойида рўйхатдан ўтган. Амалга оширадиган фаолият тури – механик дастгоҳларнинг улгуржи савдоси. Устав фонди 65 млн сўм. Ягона таъсисчиси – Абрамов Василий Витальевич, директори – Бойцов Дмитрий Александрович. Компания Тошкент шаҳри Яшнобод туманида жойлашган.

2024 йил октябрь ойида АҚШ Молия вазирлиги ҳам Uzstanex компаниясига нисбатан санкция киритган эди. Департамент қарорида таъкидланишича, компания «Россияга қарши санкцияларни четлаб ўтишда иштирок этган», жумладан, Uzstanex томонидан харид қилинган дастгоҳлар Хитойда жойлашган компаниялар орқали Россияга етказиб берилган.

2024 йил ноябрь ойида Буюк Британия ҳам Uzstanex компаниясига санкциялар жорий қилди.

Европа Иттифоқи санкцияларига дучор бўлган компаниялар қуйидаги чекловларга дуч келиши мумкин: активларнинг музлатилиши, молиявий хизматларга киришнинг чекланиши, савдонинг тақиқланиши, ҳамкорликнинг чекланиши, технологияларга киришнинг чекланиши, транспорт ва логистика чекловлари ва бошқалар.