Трамп: Украина ресурслари бўйича келишув «ўлмади»

Трампнинг фикрича, Оқ уйда имзоланмаган ноёб металлар бўйича келишув «ўлмади». Аввалроқ АҚШ молия вазири Бессент у «музокаралар столида эмас»лигини айтганди.

Фото: Yuri Gripas/Pool via CNP/AdMedia/picture alliance

АҚШ президенти Доналд Трамп ўз мамлакатининг Украинадаги ноёб металларга киришини таъминлаш бўйича келишув имзоланиши «ўлик» эканлигига ишонмаслигини айтди. «Менимча, бу биз учун катта иш, чунки Байден уруш учун жуда ва жуда аҳмоқона 350 миллиард долларни (Украинага) берган ва нима бўлганини биласиз», — деди АҚШ президенти 3 март, душанба куни журналистларга. Эртаси кунги нутқида у бу ҳақда батафсилроқ гапиришга ваъда берди.

Оммавий ахборот воситаларида Россияга нисбатан айрим санкцияларни бекор қилишга тайёргарлик кўрилаётгани ҳақидаги хабарларга изоҳ берар экан, Трамп АҚШ урушни тугатиш учун «ҳамма билан, жумладан, Европа давлатлари билан ҳам келишувга киришаётганини» айтди. Америка етакчиси, шунингдек, Қўшма Штатлар Украинага Европадан кўра «кўпроқ» берганини ва шунинг учун Украина президенти Володимир Зеленский «кўпроқ миннатдор» бўлиши кераклигини яна бир бор таъкидлади.

Зеленский АҚШ билан шартнома имзолашга тайёр

Аввалроқ Украина президенти Киев ва Вашингтон ўртасида тоғ-кон бўйича келишувни «имзолашга ҳамон тайёр» эканлигини ва Қўшма Штатлар билан «конструктив мулоқот»ни исташини айтди. Зеленский Британиянинг BBC медиа компаниясининг тегишли саволига жавоб берди. «Мен шунчаки Украина позицияси эшитилишини истайман. Биз ҳамкорларимиз бу урушда тажовузкор ким эканлигини эслаб қолишларини истаймиз», — деди у.

2 март куни Лондонда бўлиб ўтган Европа етакчилари саммитидан сўнг сўзлаган Зеленский Вашингтондаги сўнгги учрашувининг табиати ҳамкор сифатида на АҚШга, на Украинага фойда келтирмаганини, фақат Россия президенти Владимир Путин учун фойдали эканини айтди. Шу билан бирга, Украина президенти таклиф қилинса, Оқ уйга қайтишини қайд этган.

Айни пайтда АҚШ молия вазири Скотт Бессент CBS News телеканалига берган интервюсида нодир металлар бўйича келишув ҳозирча муҳокама қилинмаганини айтди. «Ўйлайманки, президент Зеленский тинчлик келишувини давом эттиришни хоҳлайдими ёки йўқми, шуни кўришимиз керак. Агар у жанглар давом этишини истаса, бекор бўладиган иқтисодий келишувнинг нима кераги бор», деди Бессент. Унинг сўзларига кўра, «президент Зеленский келиши ва ушбу иқтисодий битимни имзолаши керак эди» ва у «буни бузишга қарор қилди».