Зеленский «осмондаги сукунатни» тинчлик сари биринчи қадам деб атади

Россиянинг Украинага навбатдаги оммавий зарбасидан сўнг, мамлакат президенти Володимир Зеленский ўз шерикларини «Россияни урушни тўхтатишга мажбур қилишга» чақирди. «Украина тинчлик йўлидан боришга тайёр ва айнан Украина бу урушнинг биринчи сониясиданоқ тинчликни хоҳлайди», — деб ёзди у 7 март, жума куни Telegramʼда.

Шу билан бирга, Зеленский кеча тунда Украинанинг бир қанча минтақаларидаги энергетика объектлари яна Россия Қуролли кучлари томонидан зарбага учраганини таъкидлади. «Жами россияликлар деярли 70 та ракета — қанотли ва баллистик, шунингдек, икки юзга яқин ҳужумкор дронлардан фойдаланган. Буларнинг барчаси нормал ҳаётни таъминловчи инфратузилмага қарши», — дея таъкидлади у.

Шу билан бирга, ҳақиқий тинчлик ўрнатиш йўлидаги биринчи қадамлар «ушбу урушнинг ягона манбаи» бўлган Россия Федерациясини Украинадаги ҳаётга қарши қаратилган бундай ҳужумларни тўхтатишга мажбур қилиш чоралари бўлиши керак, деб ишонади Зеленский. «Осмонда сукунат — ракеталар, узоқ масофага учувчи учувчисиз учоқлар ва авиабомбалардан фойдаланишни тақиқлаш. Шунингдек, денгизда сукунат — нормал юк ташишнинг ҳақиқий кафолати», — дея қўшимча қилди у.

Россиянинг Украина энергетика секторига навбатдаги ҳужуми

7 мартга ўтар кечаси Украинага навбатдаги ҳужум чоғида Россия Федерацияси 67 та қанотли, баллистик, зенитли ва бошқариладиган ракеталарни, шунингдек, 194 та ҳужумкор дронлар ва дрон имитаторларидан фойдаланди. Украина қуролли кучлари 134 та ҳаво нишонини уриб туширди. Украина қуролли кучлари маълумотларига кўра, биринчи марта Россия ҳужумини қайтариш учун Украинага бир ой олдин келган Mirage-2000 француз қирувчи самолётлари ишлатилган.

Ҳужум биринчи навбатда газ ишлаб чиқариш корхоналарига қаратилган. Полтава, Одесса ва Тернопил областларида энергетика инфратузилмаси шикастланган.