Россияда 685 минг хорижлик назорат остидаги шахслар реестрига киритилди

Улар 30 апрелгача ички ишлар органларига хабар бериши ва «ҳолатини қонунийлаштириши» керак.

Фото: ТАСС

Россия Ички ишлар вазирлиги Россияда бўлиш учун қонуний асосга эга бўлмаган 685 минг хорижий фуқарони назорат остидаги шахслар реестрига киритди. Бу ҳақда Ички ишлар вазирлиги раҳбари Владимир Колоколцев маълум қилди.

«Ушбу реестрнинг асосий мақсади Россияда ноқонуний бўлган хорижий фуқаролар, яъни мамлакатда қолиш учун қонуний асосларини йўқотган шахслар сонини чеклашдан иборат. Ушбу реестрда 685 минг хорижлик бор», деди вазир.

Колоколцев сўзларига кўра, реестрга киритилган чет эл фуқаролари 30 апрелгача ички ишлар органларига хабар бериши ва «ҳолатини қонунийлаштириши» керак, шундан сўнг улар бу рўйхатдан чиқарилади.

2024 йил март ойида «Крокус Сити Холл»да содир этилган терактдан кейин Россия ҳукумати миграция сиёсатини фаол равишда кучайтира бошлади.

Жумладан, улар никоҳ орқали Россияда яшаш учун рухсатнома олишнинг соддалаштирилган тартиби чекланди, депортациянинг янги тартиби тасдиқланди, рус тилини билмайдиган мигрантларнинг фарзандларини мактабларга қабул қилиш тақиқланди.

2025 йил 5 февралдан бошлаб Россияда назорат остидаги шахслар реестри жорий қилинди. Россия ҳукумати унга мамлакатда ноқонуний бўлган чет эл фуқароларини киритишни режалаштирмоқда. Реестрга киритилганларнинг ҳуқуқлари тубдан чекланади.