«Толибон»нинг ҳам Амударёдан сув олишга ҳаққи бор – сув хўжалиги вазири

Сув хўжалиги вазири Шавкат Ҳамраев 18 март куни вазирлик ҳузуридаги жамоатчилик кенгаши аъзолари ва ОАВ вакиллари билан очиқ мулоқот ўтказган.

Gazeta.uz’нинг вазирга таяниб хабар беришича, «Толибон»нинг Амударёдан сув олиш учун қураётган Қўштепа канали 2028 йилда битиши кутиляпти.

«Бундай қилиб айтганда, афғонлар ҳам қариндошларимиз. Уларнинг ҳам Амударёдан [сув] олишга ҳаққи бор-да. [Тармоқларда] Қўштепасини қуряпти, у бўляпти, бу бўляпти, деб ёзишяпти. Нима, қурол кўтариб, [улар билан] урушишимиз керакми? Йўқ, биз борди-келди қиляпмиз, қариндош бўляпмиз, яхшироқ муносабат қуряпмиз. Уларга ҳам аста-секин тушунтирамиз, ўзингизнинг ҳаққингизни олинг [деймиз]. Кейин ҳужжатлар бўлади, бошқа бўлади, борди-келди бўлса, ҳаммасини гаплашамиз», — деган Ҳамраев.

Унинг сўзларига кўра, қўшничилик муносабатлари яхши бўлиши ва бу борада турли гап-сўзларга аҳамият қаратмаслик керак.

«Қатор йиллар „Тожикистон бир нарса қуряпти, Қирғизистон бир нарса қуряпти“, дейилди ва иккита халқ душманга айлантирилди. Қуруқ гапларга учмаслик керак. Мисол учун, қўшнинг қизларингга ёмон қараяпти ёки машинада ўтаётганда тош отяпти, деса кўнглингиз хира бўлади (кулади). Шу сабабли ҳар хил гапларга учмасдан, кечқурун ифторликка бир товоқ паловни кўтариб чиқинг, кейин у қўшнингиз қандай яхши одамлигини кўрасиз. У ҳам бор товоғим, кел товоғим қилиб, сизга яхши ният қилади. Ҳозир баъзилар қўшнисини ҳам танимайди, ким у, дейди. Эски удумларимиз қаерда қолди? Шу сабабли қўшнилар билан яқин бўлишимиз керак, муносабат яхши бўлиши зарур. Шунинг учун ҳурматли президентимизга таъзим қиламан. Чунки қўшнилар билан ўртамиздаги музлар эриди, муносабатлар яхшиланди», — деган ҳукумат вакили.