“Gold terapi” иши: Хайрулла Қосимов ва бошқалар устидан тергов бошланди

“Gold terapi” номи билан ноанъанавий усулда даволашни таклиф қилиб, турли касалликларга чалинган фуқароларни “100 фоиз даволаш кафолати” билан ишонтириб, уларнинг бир неча ўн минг долларлаб пулларини қўлга киритиб келган Хайрулла Қосимовга нисбатан Жиноят кодексининг 168-моддаси 4-қисми “а” банди (жуда кўп миқдорда фирибгарлик) билан жиноят иши қўзғатилган.

Бу ҳақда Ички ишлар вазирининг матбуот котиби Шоҳрух Ғиёсов Kun.uz’га маълум қилди.

Kun.uz манбасига кўра, “Gold terapi” иши бўйича Хайрулла Қосимов устидан ички ишлар органларига мингга яқин ариза тушган. Улар сони кундан кунга ошмоқда. Тергов жараёнида “Gold terapi” клиникаси фаолияти ҳам тафтиш қилинади. Жиноят иши шу йил март ойининг бошида қўзғатилган.

Kun.uz олдинроқ “Gold terapi” бўйича икки қисмли катта журналистик суриштирувини эълон қилганди. Унда ўзини профессор, табиб, филантроп, психохимик, “Gold terapi” асосчиси деб эълон қилган Хайрулла Қосимовдан жабрланганлар ўз ҳикояларини айтиб беришган эди. Одамлар унинг битта консултацияси учун 24 млн сўм, даволаши учун 20 минг долларлаб пул тўлашган.

Жабрланувчиларнинг барчаси Хайрулла Қосимов даволаш баҳонасида уларга гиёҳванд ичимлик ичирганини таъкидлашган.

Жабрланганларнинг аксарияти хонанда Самандар Ҳамроқулов ва YouTube'даги Chotki.tv каналининг рекламаси сабаб уларга ишониб боришганини айтишган.

Шундан сўнг Самандар Ҳамроқулов Kun.uz’га интервю бериб, ўзи ҳам алданганини, “виждон азобида қолиб кетганини” маълум қилди.

Хонанданинг айтишича, у ҳам шу ичимлик таъсирида бўлган, аммо кўрсатувни кўргунга қадар бу ҳақида ўзи ҳам билмаган. Танишларининг тавсияси билан хотиранинг пасайиши, узлуксиз чарчоқ, уйқусизлик сабабли “профессор” қабулига борган ва унинг таъсирига тушиб қолган.

Яқин кунларда ушбу клиника фаолияти ва Хайрулла Қосимовнинг ғайриоддий даволаш усули юзасидан Таиландда ўтказилган 3-махсус суриштирув Kun.uz’да саҳифасида кўришингиз мумкин.