E-tergov ахборот тизими жорий этилади: жиноят ишлари электрон шаклга ўтади

Президент фармонига (ПФ–204) мувофиқ, прокуратура органларида E-tergov ахборот тизими жорий этилади. Тизим жиноят иши юритувини тўлиқ рақамлаштириш, суд экспертизасини онлайн тайинлаш ва моддий зарарни ҳисобга олиш ҳамда ундириш жараёнларини мониторинг қилишга хизмат қилади.

Фото: iStock

Фармонга кўра, E-tergov'нинг асосий вазифалари этиб қуйидагилар белгиланди:

жиноят иши юритувининг барча босқичларини электрон шаклга ўтказиш;
суд экспертизасини онлайн режимида тайинлаш ва мувофиқлаштириш;
моддий зарарни ҳисобга олиш, ундириш ва мониторинг қилувчи рақамли контурни шакллантириш.

Ҳуқуқни муҳофаза қилиш академиясида 2026-2027 ўқув йилидан “Киберҳуқуқ” бакалавриати жорий этилади (кундузги таълим, ўқиш муддати — 4 йил).

Бош прокуратуранинг Ахборот-коммуникация технологияларини жорий этиш ва ахборот хавфсизлигини таъминлаш бошқармаси негизида Бош прокуратуранинг Рақамли технологиялар маркази ташкил этилади.

E-tergov орқали тергов ва прокурор назорати жараёнлари шаффоф, тизимли ва тезкор бўлади, инсон омили таъсири камаяди, ҳужжат айланмаси рақамлаштирилиб, қонунбузилишларни илк босқичда аниқлаш имкониятлари кенгаяди.