АҚШ: Россия Украинадаги урушда 4000 дан ортиқ танкни йўқотди

Россия Федерациясининг Украинада йўқотган танклари сони Қўшма Штатлар ихтиёридаги танклар сонига деярли тенг. Бу маълумотларни НАТО кучларининг Европадаги олий қўмондони генерал Каволи маълум қилди.

Фото: NATO/dpa/picture alliance

АҚШ маълумотларига кўра, Россия Украинага қарши урушда 4000 дан ортиқ танкини йўқотган. Бу рақам деярли бутун АҚШ танк контингентига тўғри келади, деди НАТОнинг Европадаги олий қўмондони, америкалик генерал Кристофер Каволи 3 апрел, пайшанба куни АҚШ Сенатининг қуролли кучлар қўмитасида бўлиб ўтган эшитувда.

Каволи сенаторларнинг АҚШ Киевга ҳарбий ёрдамни, разведка маълумотларини алмашиш соҳасида қўллаб-қувватловни қисқартиришда давом этса, бу Украина армияси учун қандай оқибатларга олиб келиши ҳақидаги саволига жавоб қайтарди. «Бу, албатта, уларнинг жанговар қобилиятига тез ва зарарли таъсир кўрсатади», деди у.

Генерал Каволининг сўзларига кўра, Украина қуролли кучлари Россия ракеталарини тутиб олишда АҚШ кўмагига боғлиқ ва Россия қўмондонлик пунктлари ва логистика объектларига зарба беришда Америка разведкаси маълумотларига муҳтож.

Қўшма Штатлар Россияга қарши урушда Украинанинг асосий иттифоқчиси бўлиб қолмоқда. Бироқ собиқ президент Жо Байден маъмуриятидан кўп миқдорда ҳарбий ва молиявий ёрдам кўрсатилгач, унинг вориси Доналд Трамп Украина бўйича йўналишини ўзгартирди, деб ёзади AFP. Январ ойида лавозимга киришганидан бери у Москва билан келишувга эришмоқчи.