Россиялик хоккейчи афсонавий Уэйн Гретцкининг рекордини янгилади

Александр Овечкин NHL доирасидаги голлар сони бўйича мутлақ рекордчига айланди.

Фото: Reuters

Россия миллий жамоаси ва Американинг «Вашингтон Кэпиталз» клуби ҳужумчиси Александр Овечкин канадалик афсонавий хоккейчи Уэйн Гретцки рекордини янгилади.

39 ёшли россиялик 6 апрель куни Миллий хоккей лигаси (NHL) доирасидаги ўйинда «Нью-Йорк Айлендерс» (1:4) дарвозасини ишғол қилди.

Бу Овечкиннинг 1487 та ўйиндаги 895-голи бўлди. Натижада у канадалик Уэйн Гретцкининг NHL доирасидаги голлар сони бўйича 1999 йилда ўрнатган ва абадий деб ҳисобланган рекордидан (1487 та ўйинда 894 гол) ўзиб кетди.

Александр Овечкин хоккейчилик фаолиятини 2001 йилда Москванинг «Динамо» клубида бошлаган. 2005 йилдан буён «Вашингтон Кэпиталз» клубида ўйнамоқда.

Уэйн Гретцки хоккейчилик фаолиятини 1978 йилда «Индианаполис Рейсерз» клубида бошлаган. Кейинчалик «Эдмонтон Ойлерз», «Лос-Анжелес Кингз», «Сент-Луис Блюз» ва «Нью-Йорк Рейнжерс» клубларида ўйнаб, 1999 йилда фаолиятини якунлаган. NHL доирасида кўплаб шахсий рекордлар соҳиби ҳисобланади.

#Хоккей #Александр Овечкин #Уэйн Гретцки