Овечкин МҲЛдаги 1000-голини урди

Россиялик ҳоккейчи лига тарихида Уэйн Гретцкидан кейин бу маррани забт этган иккинчи ўйинчи бўлди.

Фото: Getty Images

«Вашингтон Кэпиталз»нинг россиялик ҳужумчиси Александр Овечкин МҲЛ мунтазам чемпионатининг «Колорадо Эвеланш»га қарши учрашувида гол урди ва плей-оффларни ҳам ҳисобга олган ҳолда лига тарихида 1000 та голлик кўрсаткичга эришди.

40 ёшли Овечкин ҳисобида мунтазам чемпионатларда 923 та ва плей-оффда 77 та гол бўлди. У жами 1723 та ўйин ўтказган (мунтазам чемпионатда 1562 та ва плей-оффда 161 та).

Бу борада МҲЛ рекордчиси канадалик Уэйн Гретцки ҳисобланади — у 1694 та (1487+207) ўйинда 1016 та (894+122) гол урган.

Александр Овечкин мунтазам чемпионатларда урилган голлар сони бўйича МҲЛ рекордчиси бўлиб, ўтган мавсумда Гретцкининг рекордини янгилаган эди.

«Колорадо»га қарши ўйиндан сўнг «Вашингтон»да мунтазам чемпионатда яна 11 та ўйин қолади. Ҳозир жамоа Шарқий конференцияда 12-ўринда бормоқда ва плей-офф ҳудудидан ташқарида жойлашган.