Трамп АҚШ ядровий энергетикасини кенгайтириш бўйича фармонларни имзолади

АҚШ президенти Доналд Трамп 23 май, жума куни АҚШда атом энергиясидан фойдаланишни сезиларли даражада кенгайтиришга қаратилган тўртта фармонни имзолади. Улардан бири Ядровий тартибга солиш комиссиясининг радиация таъсири мақбул даражаларига ҳаддан ташқари эҳтиёткорлик билан муносабатда бўлиш-бўлмаслигини баҳолашни талаб қилади. Трампнинг фармонлари, шунингдек, комиссиядан 18 ой ичида ядровий реактор қурилишини тасдиқлашни талаб қилиши кутилмоқда, бу эса одатда йиллар давом этадиган жараённи тезлаштиради, деб ёзади The Hill.

Трамп томонидан имзоланган яна бир ҳужжат энергетика ва мудофаа департаментларига федерал ерларда ядровий реакторлар қуриш имконини беради, бу эса ядро энергиясидан мудофаа эҳтиёжлари ва сунъий интеллект (СИ) операциялари учун фойдаланиш имконини беради, дея қайд этади The Hill. Трамп бу соҳада Хитой ва Россияга қарамликдан қутилиш учун АҚШда уран қазиб олиш ва бойитишни ҳам кенгайтириш ниятида.

Reuters таъкидлаганидек, Трамп маъмурияти сунъий интеллектнинг ривожланиши туфайли ўн йилликлар ичида биринчи марта электр энергиясига бўлган талабнинг ўсишига дуч келмоқда. Reuters эслатишича, Трамп президентликка келган биринчи кунидаёқ миллий энергетика бўйича фавқулодда ҳолат эълон қилган.

АҚШ энергетика вазири Крис Райтнинг айтишича, сунъий интеллект учун зарур бўлган янги энергия манбалари ва маълумотлар марказларини ишлаб чиқиш «Манҳэттен лойиҳаси-2»(Иккинчи жаҳон уруши даврида АҚШнинг ядровий қурол яратиш бўйича кенг кўламли дастури)га айланади.